Salmo 59:6-15

⁶Ebpemenlikù dan ke egkesakep en is iring te asu he ebpemenhiniǥer he edliǥuyliǥuy te inged.

⁷Pemineǥa nu is ebpengeǥiyen dan; memesakit heini he iring te ispada. Egkaǥi pa sikandan te, “Wazà ebpekezineg kenami.”

⁸Piru ed-engitan nu zà sikandan, Nengazen. Ed-un-undahan nu zà sikandan is wazà medtuu kenikew.

⁹He Megbevayà, iyan ka zesen ku; edtaǥad a kenikew su ziyà a layun te kenikew edangep,

¹⁰ne iyan ka Megbevayà he mibmahal kedì. Iyan ka huna kedì ne ipeehè nu kedì is kegkezaaǥa te menge kuntada ku.

¹¹Piru hunaa nu sikandan resaya ne human nu himetayi su para kenà egkelipatan te menge etew ku is paaǥi nu te kedsilut te menge kuntada nu. He Nengazen he iyan layun ebpengalang kenami, tezina nu wey zèdeeti nu is menge kuntada ku pinaaǥi te ǥehem nu.

¹²Edhimu sikandan te salà pinaaǥi te ebpengeǥiyen dan, umbe verakat he iyan mekeutel kandan is kegkemepelevawen dan. Ebpenrawak dan wey edtarùtarù,

¹³umbe tenged te pauk nu kandan, dèdeeti nu sikandan taman te egkepurung sikandan egkahanew. Ne zutun egketuenan te keet-etawan kayi te tivuuk he kelibutan he iyan ka hadì te Israel.

¹⁴Emun mezukilem ebpemenlikù is menge kuntada ku he iring te asu he ebpemenhiniǥer he edliǥuyliǥuy te inged.

¹⁵Iring sikandan te asu he edliǥuyliǥuy su ebpen-ahà te egkekaan din, ne egngesnges emun kenà egkahantey.