Salmo 57:2-11

²Ed-umew a ziyà te kenikew te Utew Lavew he Megbevayà, iyan ka edtuman te mibpeleyaǥan nu kediey.

³Puun te langit ebpekeuma is tavang nu te kedlibri kediey. Ebpeel-elezan nu is menge etew he edsurung kediey. Ibpeehè nu is gaǥew nu wey kebmetinumanen nu para kediey.

⁴Edliǥuyan a te menge kuntada ku he iring te menge erimaung he andam he edawi te etew. Is menge ngipen dan iyan is menge vangkew wey menge vesut te panà. Is menge zilè dan iyan is meǥarang he menge ispada.

⁵Ipeehè nu, Megbevayè ku, is kegkemekeǥeǥehem nu ziyà te langit wey kayi te tivuuk he kelibutan.

⁶Neseeng a su edlitaǥen a te menge kuntada ku. Ne mibangbang daan sikandan te para egkeuluǥan ku, piru iyan sikandan neulug duen.

⁷Edsarig a ziyà te kenikew Megbevayè ku. Egkanta a te kanta he idalig kenikew.

⁸Ed-enew a emun egkeriwaswas en, ne ed-endamen ku is gehinawa ku wey is menge gelemiten ku te kedtukar he zuen menge kuwirdas su para egkeǥamit ku te kedalig kenikew.

⁹Edeliǥen ku sikew, Nengazen, diyà te teliwazà te menge etew. Egkentahan ku sikew ziyà te teliwazà te keet-etawan diyà te senge nenasyun.

¹⁰Su is gaǥew nu wey kebmetinumanen nu ne kenà egkesukud; metikang pa heini te langit.

¹¹Ipeehè nu Nengazen is kegkemekeǥeǥehem nu ziyà te langit wey kayi te tivuuk he kelibutan.