Salmo 57:1-8

¹Ay Diyos, bomadang ka, maseg-ang ka, tan din pankamangak et sik-a. Mankamangak en sik-a ay kaman kiyap ay manpasakoko en ina na enggana ay din kaeegyat ay ligligat ko et malabas da.

²Mankararagak en sik-a, Diyos ay kangatoan, ay mangidawdawat en sak-en si amin ay kasapolan.

³Manipod ed langit, omisalakan ka, din pomalpaligat, abakem daida. Ipailam en sak-en din kinamatalek mo, Apo, ya din adi manbalbaliw ay layad mo.

⁴Linmilikob di kalaban ko ay kaman dan layon ay nakasagana ay omokmon. Kaman gayang ya pana di bab-a da, kaman kampilan di dila da.

⁵Apo, din kinangatom ya panakabalin mo et ipailam koma sin am-in ay soli ed langit ya isnan daga.

⁶Inmisagana das tagdey din kalaban ko et palalo ay nadagsenan di nemnem ko. Sin pandanak nankaot das bito, ngem din nag-as et daida met laeng ay kalaban ko.

⁷Apo, napodnoak en sik-a et mankantaak ay mangidayaw en sik-a.

⁸Bomangonak ay masapa ta tokarek din gitara ya arpa.