Salmo 55:7-23

⁷Edlayang a pezem pehendiyà te meziyù he sibsivayan ne zutun a ed-ubpà.

⁸Egaanggaan a ebpen-ahà te egkeelesan ku su wey a kenà meturedu te menge kuntada ku he egkepauk kedì su iring is pauk dan te utew mevendes he vagyu.

⁹Nengazen, dèdeeti nu is menge kuntada ku; gurigawa nu is menge isip dan su wey zan kenà meuyun. Su neehè ku is kebpesipala wey kebpetebtebekà te menge etew ziyà te inged.

¹⁰Maandew wey mezukilem egkehitavù heini ziyà te minsan hendei zutun te inged. Nepenù te kelelalung wey kesamuk haazà is inged.

¹¹Minsan hendei zutun ne zuen kelelalung wey kebpendezaat, ne kenè en egkeengked is kebpendaagdaag wey kebpenlimbung diyà te menge kelesada.

¹²Ke và ku zà kuntada is ed-insultu kedì ne egkaantus ku heini. Ke và ku zà ukag is ebpendezeisey kedì ne egkelikayan ku sikandin.

¹³Piru utew ku emiǥu is mid-insultu kedì su zuma ku wey neked-iring key.

¹⁴Dengan utew key teleemiǥu, ne ebpezumehè key is edhendiyà te valey te Megbevayà duma te mahabet pa he menge etew.

¹⁵Berakat he medtik-ew mebpematey is menge kuntada ku. Berakat he evelenga sikandan te penlevengà minsan uuyag dan pa. Su ziyà te kandan is kelelalung wey ziyè daan te menge ubpeey zan.

¹⁶Piru ebuyù a mulà te tavang diyà te Nengazen he Megbevayà ne edlibriyen e zin.

¹⁷Meselem, meudtu, wey mezukilem ebpekeriklamu a zuma is kedag-es ne ebpemineǥen e zin.

¹⁸Edluwasen e zin te ebpekekaid kedì te kebpekidtebek ku, minsan mahabet is ebpekigkuntada kedì.

¹⁹Is Megbevayà he edhadì te wazà pidtemanan ebpemineǥen e zin, ne ebpekevevaan din is menge kuntada ku. Heini sikandan ne wazà kegkeveǥu te kineiya zan, wey wazè dan kedtahud te Megbevayà.

²⁰Is emiǥu ku te nehuna he timpu nekigkuntada te menge emiǥu zin; wazè din tumana is menge pesarig din.

²¹Menayù wey meupiya is kebpengaǥikaǥi zin, iyan, duen bes kedumut diyà te ǥehinawa zin, ne ibmesakit te ǥehinawa is menge lalag din, su iring heini te meǥarang he ispada.

²²Isarig nu ziyà te Nengazen is igkeseeng nu, ne edtevangan ke zin. Kenà egkehimu he ebpesegdanen din is menge metazeng te minsan hengkey he timpu.

²³Piru is menge teremunù wey menge limbungan idtimbag din diyà te mezalem he lugar te menge minatey, dutun te kenè pa sikandan edliwezeenan. Piru siak mulà, edsarig a te Megbevayà.