Salmo 50:12-23

¹²Angin ke egkevitil a, ne kenà a ebuyù te keenen diyà te keniyu, su kediey is tivuuk he kelibutan wey is langun he taǥù din.

¹³Kenè ku man egkeenen is usa zuen te tudu he vaka he ibpemuhat niw, ne kenè ku zaan ed-inumen is lengesa zuen te menge kambing.

¹⁴Siak, is Utew Lavew he Megbevayè niw, iyan egkesuatan ku he ibpemuhat niw kedì is: kebpeselamat wey is kedtumana niw te menge pesarig niw kedì.

¹⁵Umawa a keniyu te timpu te kelised su edlibriyen ku sikiyu, ne zutun edeliǥen a keniyu.”

¹⁶Egkaǥi mulà is Megbevayà diyà te lalung he menge etew te, “Wazè niw ketenged te kegkaǥi zuen te menge suǥù ku wey kebpekid-uyun ku.

¹⁷Egkeepesan niw is menge penurù ku; wazè niw seǥipaa is menge lalag ku.

¹⁸Emun ebpekeehè kew te tekawen ne ebpekid-emiǥu kew kandin, wey ebpekidrerempungen kew zaan te menge mengungumpadi.

¹⁹Mezaat is ebpengeǥiyen niw ne utew zà melemu ziyà te keniyu is kedtarùtarù.

²⁰Layun mezaat is menge lalag niw mehitenged te menge suled niw.

²¹Ne hein mibeelan niw heini is langun, wazè ku sikiyu dewaya; umbe kunaan niw ke iring a keniyu. Piru guntaan, edewayen ku sikiyu ne ibpeehè ku keniyu he utew kew lalung.

²²Pemineǥa niw heini, sikiyu is nengelipat te Megbevayà, su emun kenà, edezeetan ku sikiyu ne wazà ebpekelibri keniyu.

²³Is ebpemuhat kayi te kedì te kebpeselamat ebeǥey kedì te zengeg, ne edlibriyen ku sikan is ebpekeventayan din he kenà sikandin mekevaal te mezaat.”