Salmo 49:8-20

⁸Tan din bayad di biyag et palalo ay nangina, magay omanay si ibayad da

⁹ta matago da si eng-enggana et sin pese yan mailisi da.

¹⁰Ammon di amin ay olay din masirib et matey da ay kaman din naong-ong ya magay nemnem na. Daida am-in yan taynan dan kinabaknang da, et tawiden di aan-ak da.

¹¹Say beey da si eng-enggana din naiponponan da, olay pay mo way bokod da ay daga sin deda ay matmatago da.

¹²Adi mailisi di ipogaw sin kateyana gapo sin kinabaknang na. Kaman met laeng animal ay matey sisya.

¹³Siya nay pantongpalan di mantalek si awak da ya mapnek sin kinabaknang da:

¹⁴naitoding ay matey da, karneroy kaiarigan da. Din pese, kaman say mangipaspastol en daida. Awni et abaken din nalinteg ay ipogaw si daida, madonot awak da sin kaiponponan da ay addawi sin maptemapteng ay beey da.

¹⁵Ngem mo sak-en pay, omisalakan si Diyos Apo, tan sin panakabalin di pese sobotena din biyag ko.

¹⁶Isonga mo waday bomaknang, adi ka emegyat ono mariribokan, olay mo din kinabaknang na yan mataptapian.

¹⁷Tan mo matey, maga polos di itakina, adi na ikoyog sin kaot din kinabaknang na.

¹⁸Olay mo mapnek sin biyag nas nan daga yan idaydayaw di iib-a na begew sin kabaelana,

¹⁹awni et maitapi met laeng sin aap-o na et adi na polos maila di pat-a.

²⁰Din kinabaknang yan magay maamag na ay mangilisi si ipogaw sin kateyana. Kaman met laeng animal ay matey sisya.