Salmo 48:2-13

²Din dontog ay Zion, maptemapteng ya nakayang, siyodad ay pantean Diyos ay say Ari ay Kangatoan. Maragsakan amin ay ipogaw isnan daga begew sin siyodad ay sana.

³Si Diyos ay mismo et say kad-ana, yan pinaneknekana ay sigurado ay salaknibana.

⁴Din aari yan mantitinolong da ay mangobat ed Zion ay sana.

⁵Ngem idi inila da yan nasdaaw da, inmegyat ya nanagtag da.

⁶Manpayegpeg da si egyat da ay kaman din ligat di babai ay dandani di pan-anakana.

⁷Inabak mos daida ay kaman din panadaelan di dagem ay napigsa si bapor ay emey ed Tarsis ay kanan da.

⁸Din nadamdamag mi, maila mi ed wani sin siyodad Diyos ay daydayawen mi, Diyos ay Manakabalin Amin ay si Yahweh. Sinay di siyodad ay salakniban Diyos si eng-enggana.

⁹Nemnemnemen mi sin Timplo na din adi manbalbaliw ay layad na.

¹⁰Mandinamag din ngadan Diyos ya madaydayaw sisya sin intiro ay daga. Mangab-abak sisya gapo sin panakabalina.

¹¹Din ipogaw ed Zion, manragsak da koma, siya abe sin omili ed Juda, tan nalinteg din pangeddeng na.

¹²Din siyodad ay Zion, en yo likeden ta din nankakakayang ay beey isdi, en yo bilangen.

¹³Esten yo ay ilaen din dingding ya alad na ta sin an-ak yo yan dad-aten yon daida