1Mekeǥeǥehem is Nengazen he Megbevayè tew, ne ereg sikandin he edeliǥen is diyà te inged din he iyan is Jerusalem he ziyà te segradu he vuvungan din.
2Mekempet is ketikang kayi he vuvungan ne ebpekeveǥey te kelipey te tivuuk he kelibutan. Heini is segradu he Buvungan he Zion iyan inged te Mekeǥeǥehem he Hadì.
3Diyà is Megbevayà te melig-en he menge vahin te Jerusalem, ne impeehè din en te menge meǥinged kayi he iyan sikandin eputè dan.
4Midtigum is menge hadì su edsurungen dan is Jerusalem.
5Piru zuen dan naahà he ingkeinuinu zan; nahandek dan ne mibpemelaǥuy zan.
6Mibpengerker sikandan te kegkahandek wey kegkesekiti; neiring sikandan te vahi he ebeliliten.
7Midèdeetan sikandan te Megbevayà; neiring sikandan te varku ziyà te Tarshish he nesuǥat te mevendes he keramag he ebpuun diyà te edsilaan.
8Netudtulan key zà dengan te menge vaal te Megbevayà, ne guntaan neehè dey en heini ziyà te inged te Megbevayè dey, he Mekeǥeǥehem he Nengazen. Edlig-enan din heini he inged te taman te taman.
9He Megbevayà, mibpurungan dey ngunngunua is gaǥew nu hein diyè key te seled te valey nu.
Salmo 48
Salmo 48:1-9