Salmo 44:5-20

⁵Pinaaǥi kenikew egkezaag dey is menge kuntada zey.

⁶Wazà a medsarig he iyan ibpekezaag ku is panè ku wey ispada ku.

⁷Su iyan ka ebpengelintau para mezaag dey is menge kuntada zey. Ebpeel-elezan nu is ebpekidtebek kenami.

⁸He Megbevayà, iyan ka ibpehivantug dey layun, ne edeliǥen dey sikew te wazà pidtemanan.

⁹Piru ǥuntaan, inselikwey key en kenikew ne intuǥut nu he mepeel-elezi key. Wazè nu en dumahi is menge sundaru zey.

¹⁰Ketau nu is kegkepeleǥuwi zey te menge kuntada zey. Ne mibpenavan dan is menge azen dey.

¹¹Intuǥut nu he mebpematey key iring te menge kerehidu he mibpenlapà. Ne impeyapat key kenikew ziyà te menge nasyun.

¹²Sikami is menge etew nu, ne henduen be te imbelegyè key zà kenikew te veratu. Henduen te wazè dey pulus diyà te kenikew.

¹³Kenikew he ketau is kegkepeel-elezi kenami wey ked-eengiti kenami te siringan dey he menge nasyun.

¹⁴Duen pa menge erubasa zan he ebpekeinsultu kenami, ne ebpurung dà sikandan ebpenggemen-gemen is edsudì kenami.

¹⁵Layun ad ebpeel-elezi. Ne igkeeled ku en is kegkaahaa te vuked ku,

¹⁶tenged te ebpengeǥiyen wey ked-insultuwi kedì te menge kuntada ku he egkesuat he ebpenimales kedì.

¹⁷Nehitavù heini is langun minsan pa te wazè dey sikew lipati, ne wazè key zaan medrapas te paaǥi te kebpekid-uyun nu kenami.

¹⁸Wazè key med-iniyug kenikew ne wazè key medsuwey ziyà te zalan he ibpeikul nu kenami.

¹⁹Iyan, henduen be te midrupet key kenikew wey mibey-anan diyà te utew merusirem he ed-ubpaan te leew he menge asu.

²⁰He Megbevayà, egketuenan nu emun midlipatan dey sikew wey ke ziyè key ed-ampù te zuma he menge megbevayà, su egketuenan nu man minsan is id-eles te etew he isip din.