Salmo 40:5-12

⁵Nengazen he Megbevayè ku, wazà ebpekeiring kenikew. Mahabet is egkein-inuwan he mibeelan nu, wey mahabet is menge pelanu nu para kenami. Ne kenè ku heini igkeseysey pudu su utew medmezakel.

⁶Wazà mekepenunuat kenikew is nekedseselekawà he kelasi te menge pemuhat. Wazè ka mebuyù te menge pemuhat he edtutungen wey pemuhat he para idlumpiyu. Kekenà, midhimu a kenikew he mepezumdumahan kenikew.

⁷Umbe, migkaǥi a te, “Heini e zed, andam a he edtuman te menge suǥù nu sumalà is ingkesurat he menge lalag nu mehitenged kedì.

⁸Megbevayè ku, igkelipey ku is kedtuman te egkesuatan nu. Edtipiǥan ku ziyà te ǥehinawa ku is menge kesuǥuan nu.”

⁹Edtudtulen ku is kedlibriya nu kedì diyà te egketiǥum he menge etew nu. Netuenan nu Nengazen he kenà a ed-engked he edtudtul kayi.

¹⁰Is kedlibriya nu kediey wazè ku ziyè dà tipiǥi te ǥehinawa ku, kekenà, ibpenudtul ku zaan he metinumanen ka wey edluwas ka. Ne wazè ku ieles is gaǥew nu wey ketutuanan diyà te ketiǥuman dey te menge etew nu.

¹¹Nengazen, kenè nu eǥena is hizu nu kediey. Berakat he is gaǥew nu wey kebmetinumanen nu egkehimu he iyan layun pengalang ku.

¹²Henduen be te edliǥuy kedì is menge kelised he utew subra is kahabet. Henduen be te egketembunan ad te menge salè ku, ne kenà ad ebpeketuredu te hustu he ibayè ku. Henduen be te edhuna pa he mezakel is menge salè ku te vulvul ku, ne tenged kayi naawè en is kevurut ku.