Salmo 37:4-36

⁴Én nimòyu klehewyu Amuito Dwata, na blén di gamu dad knayè i nawayu.

⁵Fagotyu i ktoyu na kdee nimòyu di Amuito Dwata; smalig gamu di kenen na tnabengan gamu.

⁶Na ku én nimòyu, fite Dwata i katluyu di kdee to; na i kfiten i klandè salàyu salngad i kfiten kneng i duh di kaltu i duh.

⁷Fanak gamu na fantahàyu i nawayu fatan i ktabeng Amuito Dwata gamu; na nangyu fsamuk i nawayu gablà di bong gwè i dad to sasè, na gablà di to too fulung dmohò i sasè fandaman.

⁸Nang gamu flabè, tagakyu i kalbut nawayu! Na nangyu fsamuk i nawayu du én i gamgebe gamu di sasè.

⁹Ani gmangu du nun duh kadang maklang i nimò dad to sasè, bay i dad to smalig di Amuito Dwata gfunla i banwe fakangan dale.

¹⁰Di là mlo ani, i dad to sasè, là ale teen dini di tah tanà ani; balù ku tooyu ale fanngabal, làyu teen.

¹¹Kabay dad to nun kafdanà nawala i baling mfun kadang i banwe, na too nun klehewla na ktanak nawala di fye knèla ditù.

¹²I dad to sasè galla fandam ku tan i kibòla mlayam i dad to matlu; nkabla i beengla mdà di knang nawala dale.

¹³Kabay nulé ale Dwata, du gadean sa na là mlo malmo ale.

¹⁴Nsò i dad to sasè i dad faisla, na bantulla i boholla du fye fnatila i dad to landè na i dad to matlu;

¹⁵bay di ksòla i faisla tabaling dale i mati du dale sa baling i gugtibe i faisla, na i bohol i tabantulla baling tfò.

¹⁶I tukay nfun i to matlu too mabtas fa di bong knun i dee to sasè,

¹⁷du i gal i dad to mimò sasè nwè Dwata, bay tangalan i dad to matlu.

¹⁸Klit i duh gadè i Amuito Dwata kagkah i dad to matlu, na nfunla i banwe fakangan di dale kel di landè sen.

¹⁹Na di bang i klandè, là ale madlà di ksaligla di Dwata, du balù kel i bong kbitil nun lukas i knaanla.

²⁰Kabay dad to sasè mati ale; i dad dmuen Amuito Dwata mlal mati salngad i dad bulek di bnas, na mlal ale lana gambet i buk.

²¹I dad to sasè gal mdem bay là gmagan tamlas i ndemla, bay i to fye too mayè mlé.

²²Du dad to gumlé Dwata i kafye, dale gamfun i banwe fakang Dwata dale; bay i dad to knangan nawa, falwaan ale di banwe én.

²³I Amuito Dwata malak i satu to di kagun na di nimoan, na i dad to gaflehew kenen fgalan i klafàla di kdee nimòla;

²⁴du balù gsindul kenen laan tì gafles fugen, du i magot kenen i Amuito Dwata.

²⁵Ani tatua agu nan, bay mdà fa di tingà agu kel ani, landè fa teengu i to matlu ku tatì fbayà Dwata, na landè fa teengu ku i dad ngaan gal mni kakaanla mdà di klandèla.

²⁶I satu to matlu too mayè mlé na fdem di dademen to; na i dad ngaan mablé kafye.

²⁷Taman knagolyu i sasè nimò na baling gamu mimò fye, du fye mnè gamu di banwe fakang Dwata kel di landè sen.

²⁸Hae, du én alò kayè Amuito Dwata i katlu, na laan sa fbayà i dad to faglut di kenen kel di landè gusenan; bay i bel dad to mimò sasè falmon ale.

²⁹Gfun i dad to matlu i banwe fakang Dwata dale, na én i gumnèla kel di landè sen.

³⁰I to matlu too nun gukmamu i galan man, na ku mukum kenen too glut i kukuman;

³¹du i flalò Dwata déén di lam i nawan, na laan nlafà.

³²I to sasè toon neye i to matlu, du mngabal kfagun mati kenen.

³³Kabay là fbayà Amuito Dwata i to fye di falel i dad to dmuen kenen; balù nebela kenen di kasfala là faloh Dwata ku nukumla kenen di salà.

³⁴Smalig gamu di Amuito Dwata di kfatanyu kenen, na nimenyu i dad flaloan; na toon gamu fdatah fagu di kablén gamu i banwe fakangan di gamu, na teenyu kadang i kalmo dad to sasè.

³⁵Talmengu mite satu sasè to too fdatahan i kton; salngad kenen di satu mdatah kayu sidar di banwe Lébanon.

³⁶Kabay di là mlo mlius agu lêman di gumnean na talaan déén, balù tan i kibògu mngabal kenen làgu nan teen.