Salmo 37:21-39

²¹Is lalung he menge etew ne emun ed-utang ne kenà ebayad. Ne kelelaǥan mulà is menge metazeng.

²²Is menge etew he edtuvazan te Nengazen, ebpedayun is ked-ubpè dan kayi te tanà he Israel. Piru is etew he edrewakan din edsegseǥen puun kayi he tanà.

²³Egiyahan te Nengazen is kada langkad te etew he ebpekepenunuat te Nengazen is kebpengungubpaan din.

²⁴Minsan ebpekesipà sikandin ne kenà egkepiley su egewazen sikandin te Nengazen.

²⁵Puun te vatè e pa taman en guntaan te meǥurang e en, ne wazè e pa mekaahà te metazeng he menge etew he mibey-anan te Nengazen etawa mekepekilimus te keenen is menge anak dan.

²⁶Layun pa sikandan ebpekepememeǥey wey ebpekepesambey, ne is menge anak dan nehimu he tuvad diyà te zuma he menge etew.

²⁷Likayi niw is mezaat ne veeli niw is meupiya su para taman te taman is kebpekeubpè niw kayi te tanà he Israel.

²⁸Su igkesuat te Nengazen is hustu he kukuman ne kenè din ebpesegdanen sikan is menge metinumanen he edsunud kandin. Edtipiǥan din sikandan te taman te taman, piru is menge kevuwazan te lalung he menge etew ne edsegseǥen mulà puun te tanà he Israel.

²⁹Is menge metazeng mulà pedayun he ebpekeubpà dutun te tanà te taman te taman.

³⁰Hustu is menge lalag te metazeng ne egkezumahan te ketau.

³¹Edtipiǥan din diyà te ǥehinawa zin is menge kesuǥuan te Megbevayè din ne kenè din heini edrepasen.

³²Is lalung he menge etew, ed-eyanan dan is menge metazeng, su egkesuatan dan te edhimatey.

³³Piru kenà idtuǥut te Nengazen he mepatey zan is menge metazeng. Ne kenà idtuǥut te Nengazen he mehukumi te silut is menge metazeng emun ebpekeetuvang dan diyà te hukmanan.

³⁴Sarig ka te Nengazen ne tumana nu is paaǥi zin, ne ebeǥayan ke zin te zengeg pinaaǥi te pedayun he kebpeubpaa zin kenikew kayi te tanà kayi te Israel. Ne egkeehè nu is kedsegseǥa te menge mezaat he etew puun keniyan he tanà.

³⁵Hein nehuna he timpu, duen neehè ku he lalung he etew he ebpendaagdaag. Ed-isipen din is keugelingen din he lavew te zuma; iring sikandin te metawis he kayu he sidru ziyà te Lebanon.

³⁶Iyan, te huziyan he timpu minatey sikandin; nahanew en sikandin. Mibpen-ehè ku sikandin, ne wazè ku en maahà.

³⁷Ne ahaa nu purungi is etew he wazà duen igkesawey he ebpengungubpaan te hustu wey melinew. Duen din mulà meupiya he egkepaabut.

³⁸Piru is menge mekesesalà ne pudu ebpendezeeti; wazà meupiya he egkepaabut dan.

³⁹Baal te Nengazen is kelibriyanan te menge metazeng. Iyan sikandin edhimu te paaǥi para kenà sikandan memenu emun timpu te kelised.