Salmo 37:2-27

²Tan nabeas ya mola di kaiarigan da, sinkaattikan et matey ya mamaga da.

³Si Diyos et di talkem ya din siged di amagem, ta omandoy biyag mos nan daga ya magay mapasamak en sik-a.

⁴Malaydan ka koma ay mansilbi en Diyos ay wadad daya, et din amin ay laydem yan idawat na.

⁵Italek mon biyag mo en sisya et tolongan daka.

⁶Paneknekanan to ay siged ya nalinteg ka, et kaman pat-an di alas dosi di kinalawag na.

⁷Sin sangoanan Diyos, gominek ka koma ya anosam ay sed-en din amagena. Adi kan omapal en daida ay bomaknang gapo sin lawa ay am-amagen da ya matongpal din lawa ay panggep da.

⁸Din apal ya bonget et pandokogam, tan din pantongpalan da et panbasolam.

⁹Tan madosa dan to din mangam-amag si lawa, ngem din mantalek en Diyos et okaen da din daga.

¹⁰Baken bomayag et mamaga din mangam-amag si lawa, olay estem ay anapen daida et maga da.

¹¹Ngem din napakombaba et okaen da din daga, ganasen da di siged ay biyag ya talna.

¹²Din mangam-amag si lawa et man-gayetget das bonget da mo ilaen dan ipogaw ay siged di ogali na, et panggepen day lawa ay maikontra en sisya.

¹³Ngem si Diyos pay et sis-iyekanas daida, tan ammo na ay dandani di kadosaan da.

¹⁴Din makedse et isagana da din kampilan ya pana da ta peslen da din nabibiteg ya kaseseg-ang ay iib-a da ya siya abe din nalinteg di kabibiyag na.

¹⁵Ngem din kampilan da di mamse sin mismo ay awak da ya magotlo din pana da.

¹⁶Din at-atik ay sanikwan di nalinteg et nabanbanol da mo din kinabaknang di amin ay mangam-amag si lawa.

¹⁷Tan kaanen Diyos din kabaelan di ipogaw ay lawa, ngem din nalinteg pay et salsalaknibanas daida.

¹⁸Ay-ayowanan Diyos din managtongpal en sisya sin am-in ay agew di biyag da, ya din daga ay tinawid da et oka das eng-enggana.

¹⁹Sin timpon di ligat, adi dan maligatan, olay mo betil, adi dan mankolang.

²⁰Ngem din kalaban Diyos ay din mangam-amag si lawa, sabsabong ya asok di kaiarigan da, tan sinkaattikan et mamaga da.

²¹Man-otang di managbasol yan adi dan manbayad, ngem din nalinteg, man-idawat da ay silalayad.

²²Din binindisyonan Diyos et okaen da din daga ngem din dosaena et maipakaan da.

²³Si Diyos di mangitdo si kosto ay danan tako mo malaydan sin kabibiyag tako.

²⁴Olay mo maisokba tako, kasin takon bomangon, tan wadas Diyos ay tomoltolong.

²⁵Manipod sin kakitkittoy ko engganas nakayak, maga polos di nangilaak si nalinteg ay binaybay-an Diyos ono din an-ak na yan manpalpalimos.

²⁶Kanayon ay nakasagana ay man-idawat ya man-ibolod sin iib-a na, manbalin abe ay bindisyon din an-ak na.

²⁷Dokogan yo din lawa ta din siged di amagen yo ta say mantee kayos eng-enggana sin daga ay tinawid yo.