Salmo 37:16-33

¹⁶Din at-atik ay sanikwan di nalinteg et nabanbanol da mo din kinabaknang di amin ay mangam-amag si lawa.

¹⁷Tan kaanen Diyos din kabaelan di ipogaw ay lawa, ngem din nalinteg pay et salsalaknibanas daida.

¹⁸Ay-ayowanan Diyos din managtongpal en sisya sin am-in ay agew di biyag da, ya din daga ay tinawid da et oka das eng-enggana.

¹⁹Sin timpon di ligat, adi dan maligatan, olay mo betil, adi dan mankolang.

²⁰Ngem din kalaban Diyos ay din mangam-amag si lawa, sabsabong ya asok di kaiarigan da, tan sinkaattikan et mamaga da.

²¹Man-otang di managbasol yan adi dan manbayad, ngem din nalinteg, man-idawat da ay silalayad.

²²Din binindisyonan Diyos et okaen da din daga ngem din dosaena et maipakaan da.

²³Si Diyos di mangitdo si kosto ay danan tako mo malaydan sin kabibiyag tako.

²⁴Olay mo maisokba tako, kasin takon bomangon, tan wadas Diyos ay tomoltolong.

²⁵Manipod sin kakitkittoy ko engganas nakayak, maga polos di nangilaak si nalinteg ay binaybay-an Diyos ono din an-ak na yan manpalpalimos.

²⁶Kanayon ay nakasagana ay man-idawat ya man-ibolod sin iib-a na, manbalin abe ay bindisyon din an-ak na.

²⁷Dokogan yo din lawa ta din siged di amagen yo ta say mantee kayos eng-enggana sin daga ay tinawid yo.

²⁸Tan si Diyos et din kinalinteg di laydena ya adi na baybay-an din matalek ay ipogaw na. Kanayon ay salaknibanas daida, ngem din an-ak di mangam-amag si lawa et maipakaan da sin daga.

²⁹Din nalinteg di mangoka sin daga et mantee das di si eng-enggana.

³⁰Din nalinteg et kostokosto din kali na, ipaila da din sirib na.

³¹Nenemnemena din bilbilin di Diyos na et maga di kasangawana.

³²Din managbasol et siimena din nalinteg ay ipogaw ta peslena.

³³Ngem adi baybay-an Diyos sin panakabalin di kalabana, adi na ipalobos ay makeddengan mo idarum da.