Salmo 35:12-27

¹²Mezaat is ibales dan te meupiya he ebeelan ku ziyà te kandan, umbe neselekawan a utew.

¹³Piru emun egkezeruwan dan, ebpetuusan ku he igkeseeng ku sikandan pinaaǥi te kebivisti ku te saku wey kebpuasa. Ne emun kenà edtevaken is ampù ku para kandan,

¹⁴epekeriǥuriǥu a is edlalew he iring te suled ku wey emiǥu ku is igkeseeng ku. Nekezuzungul a is egkeseeng su is kegkeseeng ku kandan iring daan te kegkeseeng te sevaha he etew te iney zin.

¹⁵Iyan, hein iyan ad midlised, mid-amur-amur zan is egkengelipey. Mid-amur-amur zan is edezaat kedì. Ne wazè ku metueni ke maan. Ne edsiguduwan e zan en ed-ituka.

¹⁶Duma zan is memesudì he wazà medtuu te Megbevayà su utew zekelà is pauk dan kedì.

¹⁷Nengazen, kenè nu ipedayun is kenè nu kedtavangi kedì. Libriya ad te ked-etekiya kedì kayi te iring te menge erimaung.

¹⁸Ne zutun te kedlibriya nu kedì, edeliǥen ku sikew wey ebpeselamatan diyà te ketiǥuman te menge etew nu.

¹⁹Kenè nu ituǥut he melipey is limbungan he menge kuntada ku tenged te kegkezeeǥa zan kedì. Is ebpemendumut kedì te wazà hustu he hinungdan, kenè nu ituǥut he meengiti e zan.

²⁰Wazà menge lalag dan he meupiya he ebpekepeupiya te zuma he etew, kekenà, ebaalvaal sikandan te mezaat he tudtul su wey megurigew sikan is melinawen en is ked-ubpè dan kayì he lugar.

²¹Imbensag dan kayi te kediey is pesangil zan, he ke sikandan te, “Neehè dey is mezaat he mibeelan nu.”

²²Nengazen, neehè nu heeyan, umbe kenè ka và dà redtan. Kenà a kenikew pekeziyui.

²³Nengazen he Megbevayè ku, levani e en kenikew kayi te menge etew he mibpesangil kedì.

²⁴Nengazen he Megbevayè ku, ǥeina te kenè ka ebpemintahà, ne ipetueni nu te menge etew he wazè ku salà. Kenè nu ituǥut he ed-eengitan e zan.

²⁵Kenè nu ituǥut he mekekaǥi sikandan te, “Netuman en human is penganduy zey te kedezaat kandin!”

²⁶Is langun he iyan igkelipey zan is menge kebpekaantus ku, berakat he egkepeel-elezan wey egkeliveg sikandan. Berakat he sikan is langun he neminusan kediey, kenà medlampus is tuyù dan wey mepeel-elezi sikandan.

²⁷Berakat he mekeugyab te kegkelipey is menge etew he igkelipey zan is kenà ked-utengi kedì te salà he impesangil kedì. Berakat he layun sikandan mekekaǥi te, “Utew zait he edeliǥen is Nengazen ne igkelipey zin is keupiyaanan te suluǥuen din.”