Salmo 33:8-15

⁸Is langun he etew kayi te kelibutan ereg he edtahud te Nengazen.

⁹Su migkaǥi zà sikandin ne nehimu en is kelibutan. Mibmandù dà sikandin ne nehimu is langun.

¹⁰Edèdeetan te Nengazen is pelanu te menge nasyun, ne kenè din idtuǥut he medlampus is menge tuyù dan.

¹¹Piru is kandin mulà he menge pelanu ne ebpedayun te wazà pidtemanan; is kandin he menge ketuyuan kenà egkaawà taman te taman.

¹²Utew zeyzey is nasyun he iyan Megbevayè din is Nengazen. Utew zeyzey is menge etew he migaked te Nengazen.

¹³Puun diyà te langit edtengtengan te Nengazen is langun he menge etew.

¹⁴Diyà sikandin te ubpeey zin ne edtengtengan din is langun he ed-ubpà kayi te kelibutan.

¹⁵Iyan sikandin mibeǥey te isip diyà te langun he menge etew, ne netuenan din is langun he ebpen-ul-ulahan dan.