Salmo 33:2-18

²Deliǥa niw is Nengazen pinaaǥi te alpa. Tukari niw is Nengazen te zuma pa he menge pezaǥing he zuen din menge kuwirdas.

³Kentahi niw sikandin te veǥu he kanta; tukari niw sikandin te meupiya, ne ugyab kew tenged te kegkelipey niw.

⁴Su tutuu is lalag te Nengazen, ne egkeseriǥan is langun he ebeelan din.

⁵Egkasuat is Nengazen he ebaal te metazeng wey hustu. Egkaahà kayi te tivuuk he kelibutan is gaǥew zin.

⁶Pinaaǥi te lalag te Nengazen, nehimu is langit: andew, bulan, wey menge vituen.

⁷Midtingeb din is wahig te zaǥat he henduen be te intaǥù diyà te gerepun etawa insavuk diyà te budiga.

⁸Is langun he etew kayi te kelibutan ereg he edtahud te Nengazen.

⁹Su migkaǥi zà sikandin ne nehimu en is kelibutan. Mibmandù dà sikandin ne nehimu is langun.

¹⁰Edèdeetan te Nengazen is pelanu te menge nasyun, ne kenè din idtuǥut he medlampus is menge tuyù dan.

¹¹Piru is kandin mulà he menge pelanu ne ebpedayun te wazà pidtemanan; is kandin he menge ketuyuan kenà egkaawà taman te taman.

¹²Utew zeyzey is nasyun he iyan Megbevayè din is Nengazen. Utew zeyzey is menge etew he migaked te Nengazen.

¹³Puun diyà te langit edtengtengan te Nengazen is langun he menge etew.

¹⁴Diyà sikandin te ubpeey zin ne edtengtengan din is langun he ed-ubpà kayi te kelibutan.

¹⁵Iyan sikandin mibeǥey te isip diyà te langun he menge etew, ne netuenan din is langun he ebpen-ul-ulahan dan.

¹⁶Is hadì kenà ebpekezaag te tebek tenged dà te kezakel te menge sundaru zin. Is sevaha he sundaru kenà ebpekeǥawas he libri puun te tebek tenged dà te kezesen din.

¹⁷Kenà tenged te menge kudà is kebpekesiguru te kebpekezaag te tebek. Kenà ebpekelibri is kezesen dan.

¹⁸Ebentayan te Nengazen is menge edtahud kandin, he edsarig te kebmahala zin kandan.