Salmo 33:11-20

¹¹Piru is kandin mulà he menge pelanu ne ebpedayun te wazà pidtemanan; is kandin he menge ketuyuan kenà egkaawà taman te taman.

¹²Utew zeyzey is nasyun he iyan Megbevayè din is Nengazen. Utew zeyzey is menge etew he migaked te Nengazen.

¹³Puun diyà te langit edtengtengan te Nengazen is langun he menge etew.

¹⁴Diyà sikandin te ubpeey zin ne edtengtengan din is langun he ed-ubpà kayi te kelibutan.

¹⁵Iyan sikandin mibeǥey te isip diyà te langun he menge etew, ne netuenan din is langun he ebpen-ul-ulahan dan.

¹⁶Is hadì kenà ebpekezaag te tebek tenged dà te kezakel te menge sundaru zin. Is sevaha he sundaru kenà ebpekeǥawas he libri puun te tebek tenged dà te kezesen din.

¹⁷Kenà tenged te menge kudà is kebpekesiguru te kebpekezaag te tebek. Kenà ebpekelibri is kezesen dan.

¹⁸Ebentayan te Nengazen is menge edtahud kandin, he edsarig te kebmahala zin kandan.

¹⁹Iyan sikandin edlibri kandan te kemetayen wey ed-uyag kandan emun timpu te vitil.

²⁰Edtaǥad kiw zuma is kedsarig te Nengazen. Iyan sikandin edtavang wey ebpengalang kenitew.