Salmo 31:3-23

³Sik-a tet-ewa di kaman dontog ay enak pantabonan, ta adi omdas di kalaban. Gapo sin karim, omiturong ka.

⁴Sin tagdey di kalaban ko, omilisi ka koma, tan din pankamangak et sik-a.

⁵Intalek ko din ab-abiik ko en sik-a, tan Diyos ka ay matalek ya tet-ewa, et namnamaek ay omisalakan ka.

⁶Kaliliget mo din mandayaw si didiyosen ay magay silbi na, ngem sak-en pay, mantalekak en sik-a.

⁷Dadlonak manragragsak, Apo, begew sin adi manbalbaliw ay layad mo, tan ammom din problimak ya ligat ko.

⁸Adim inpalobos ay dompap din kalaban ko mo adi et inmiey ka sin lugar ay magay danag ko.

⁹Maseg-ang ka, Apo, tan waday problimak. Mansakit nan matak gapo si kaoogak yan nay enggay nabbayak.

¹⁰Begew sin palalo ay ladingit ko, enggay inmaptik din biyag ko. Gapo sin ligligat ko, enggay kinmapsotak, olay abe din tong-ak.

¹¹Lomaslasoy din kalaban ko, masepsep din katokmang ko. Olay din gagayyem ko yan emegyat da, lomisi da mo omila da sin kalsada.

¹²Kamanak natey ay nilinglingan da ono nagopak ay banga ay inwasit da.

¹³Dedengngek din ayasak di kalaban ko, kaeegyat sin nanliniked ko. Mantotolag da ay omibaw da, manpaplano da en pomse da.

¹⁴Ngem mantalekak en sik-a, Apo, sik-a di bigbigek ay Diyos ko.

¹⁵Sik-ay makaammo sin intiro ay biyag ko, omisalakan ka koma sin pomalpaligat ay kalaban ko.

¹⁶Maseg-ang ka koma en sak-en ay mansilsilbi en sik-a. Gapo sin layad mo ay magay panbalbaliwana, omisalakan ka koma.

¹⁷Sik-a, Apo, di pankararagak, adim kod ipalobos ay maibabainak. Say maibabain koma din mangam-amag si lawa ya sin kad-an di natey di panturongan da. Isdi et kanayon ay gomiginek da.

¹⁸Din maetek, paginkem koma, tan ipapangato dan awak da ay manglaslasoy ya mangipalawlawa sin ipogaw ay nalinteg di ogali na.

¹⁹Nakaskasdaaw din kinasiged mo sin mangipatpateg en sik-a, Apo. Din kaipoipogaw yan maila da din kinasiged mo sin mantalek en sik-a.

²⁰Wada ka ay manalsalaknib en daida sin planon di ipogaw ay lawa ya sin ipabasol di kalaban da.

²¹Madaydayaw ka ay Diyos tan nakaskasdaaw din inyat mo ay nangipaila sin adi manbalbaliw ay layad mo idi linmikob din kagobat ko.

²²Madandanaganak en naisianak en sik-a, Apo, ngem dinngem din kararag ko sin nankedawak si badang mo.

²³Dakayo am-in ay matalek ay ipogaw di Apo, ipaila yo en sisya din layad yo. Din matalek yan ayowanana, ngem idawat na di kosto ay dosa sin mangipapangato si awak na.