Salmo 27:5-9

⁵Tan sin timpon di ligat ko somalin sisya, itabonas sak-en sin oneg di Timplo na. Salaknibanas sak-en sin nakayang ay bato, tan sidi, adi makaabot din kaibaw ko.

⁶Awni et abakek din lomilikob ay kagobat ko, et peteg di ragsak ko ay man-idaton si animal sin Timplo yan ipigsak din kantak ay mangidaydayaw en Apo.

⁷Dengngem koma mo mankararagak en sik-a, Apo. Maseg-ang ka koma ta songbatam nan adawag ko.

⁸Kanam en, “Omali kayo ay mandayaw en sak-en.” Kanak abe, “Aw Apo, sik-a di enak daydayawen.”

⁹Sak-en di baam, adi ka koma tomaytaynan, adi ka omibonget ya omipakaan, tan sik-a din kanayon ay en namadbadang, sik-a, Apo, di Diyos ay mangisalakan.