Salmo 25:4-18

⁴Itdom kod din pandanak ay kosto ta say amagek din laydem, Apo.

⁵Itdom di iyat ko ay mangonod sin ibilang mo ay tet-ewa, tan din Diyos ay omisalakan et sik-a, isonga di pantalkak ay kanayon et sik-a.

⁶Nemnemem koma din seg-ang mo ya adi manbalbaliw ay layad mo ay inpappailam manipod ed nabaon, Apo.

⁷Pakawanem koma din basbasol ko sin kakitkittoy ko. Nemnemem komas sak-en gapo sin kinasiged mo ya adi manbalbaliw ay layad mo.

⁸Sik-a ay Diyos, gapo ta siged ya nalinteg ka, itdom sin managbasol din danan ay onodan da koma.

⁹Iturong mo din napakombaba sin kosto ay danan da ya itdom din laydem en daida.

¹⁰Kanayon ay matalek ka ya ipailam din layad mo sin managtongpal sin intolag mo ya bilbilin mo.

¹¹Ad-ado kayman di basbasol ko, ngem pakawanem koma gapo sin ngadan mo.

¹²Din mangipateg en sik-a et itdoam daida sin kosto ay danan ay onodan da.

¹³Kanayon to ay mayat di biyag da ya din inkarim ay ili et tawiden din an-ak da.

¹⁴Gagayyem Diyos din mangipateg en sisya et ipasigurado nan daida din intolag na.

¹⁵Naimongsan din nemnem kon sik-a, Apo, tan omisalakan ka sin am-in ay ligat ko.

¹⁶Somagong ka, Apo, ta maseg-ang ka, tan magay bomadang yan pomalpaligat da.

¹⁷Palag-anem koma nan problimak, omisalakan ka sin am-in ay panligatak.

¹⁸Ilaem kod nan ladingit ya ligat ko ta pakawanem am-in ay basol ko.