Salmo 25:3-17

³Is edsarig kenikew kenà egkepeel-elezan, iyan, egkepeel-elezan sikan is edluib kenikew.

⁴Penurua a, Nengazen, te menge paaǥi nu.

⁵Penurua a te paaǥi para kenà a mekesuwey te tutuu, su iyan ka Megbevayà he menluluwas ku. Layun a edsarig kenikew.

⁶Tentenuzi nu, Nengazen, is hizu wey ǥaǥew nu he impeehè nu puun pa zengan.

⁷Ne kenè nu en tentenuzi is menge salà he neveelan ku hein betan-en e pa. Tenged te ǥaǥew nu, tentenuzi a, Nengazen, su wey nu ikepaahà is keupiya nu.

⁸Meupiya ka wey metazeng ka, Nengazen, umbe ipenurù nu ziyà te menge nengetazin is hustu he zalan.

⁹Egiyahan nu is kenà menge mepelevawen te kebaal te hustu. Ipenurù nu kandan is kenikew he menge paaǥi.

¹⁰Dutun te langun he ebeelan nu, ipeehè nu is gaǥew nu wey kegkemetinumanen nu ziyà te menge edsunud te ibpetuman diyà te kesuǥuan nu.

¹¹Nengazen, minsan mahabet is menge salè ku, peseyluwa a kenikew, su para mezeliǥi ka.

¹²Nengazen, is menge etew he edtahud kenikew, egiyahan nu wey zan meikul is dalan he ereg he ed-ikulen.

¹³Meuswaǥen is ked-ubpè dan, ne ebpedayun is ked-ubpà te menge kevuwazan dan diyà te tanà he Israel.

¹⁴Nengazen, utew nu emiǥu is menge etew he edtahud kenikew ne ibpetentenuzan nu kandan is kebpekid-uyun nu kandan.

¹⁵Diyè e zà layun edangep te kenikew, su iyan ka edlibri kedì te ebpekezezaat kedì.

¹⁶Pemineǥa a wey kehizuwi a, su midsebsevaha a ne edèdaaǥen a.

¹⁷Mid-iseg en is menge kemereǥenen ku; libriya a te kegkeliveg ku.