Salmo 22:8-26

⁸Manla, “A, én kun gusmalig to ani di Amun Dwata. Fadé neyeito ku tnabeng kenen i Amun! I Amun nan falwà kenen, ku glut toon kenen kando.”

⁹Kabay ge, Dwata, i fsut deg mdà di tien yêgu, na ge i mifat deg di ktutùgu fa di yêgu.

¹⁰Alò ge i gusmaliggu mdà di ksutgu kel ani, na landè dademe dwatagu, alò ge.

¹¹Nang ge moon fawag di deg, du too mdadong i kaflayam di deg, na landè dademe fakay tmabeng.

¹²Too dee to mnang nawa samlibut deg, du fanla agu falmo. Salngad ale i dad labè lagi baka mdà di banwe Basan mayè falmo i dad to.

¹³Na salngad ale i dad malbang labè lmanaf liyun mngat i dad bàla du kagula makét na samkah deg, na gambet too ale mngal fite i klabèla.

¹⁴Taman too tì landè gal i lawehgu di klikògu, salngad di yéél mkok di tanà, tì landè sa. Lyalogu i dad tulangu mti mkah di gusagotla, na lêman i kafalyalogu i ktogu sadi mtunal di klikògu gambet i talu mtunal.

¹⁵Na i bkakonggu too kafag salngad di kfung, na damkat dilàgu di laflalgu. Ani i kagkahgu du gambet tatnagakam agu di kfung, di agot i fati.

¹⁶I kibòla deg salngad i dad labè ayem samtlaban falmo deg, du nun dee to mimò sasè samlibut deg; na tatanbakla i dad kmalgu na dad blìgu.

¹⁷Too gfan kdee tulangu, na tatì meye dad to dmuen deg na too ale lehew di kaflayamgu.

¹⁸Sansalella i klawehgu; na fagu di kasbunut neyela ku simto gamfun dun.

¹⁹Kabay ge, Amugu Dwata, nang ge fawag di deg, du alò ge gumgal i nawagu. Gasil ge tmabeng deg!

²⁰Falwaam agu di fati; falwaam i ktogu di agot dad to gambet i labè ayem mayè falmo deg,

²¹falwaam agu mdà di dad to gambet i labè liyun na i dad mlayal lagi baka; falwaam agu du landè kibògu falwà i ktogu.

²²Na tulengu kadang di dad togu i kafye mgimoam, na dnayenta ge déén di kastifun i kdee tom.

²³Mangu di dale, “Kdeeyu nun klikò di Amuito Dwata, dnayenyu kenen. Fdatahyu kenen, gamu bel Dyékob; nafèyu kenen, gamu bel Israél.

²⁴Hae, du laan tì tnagak i to maflayam, na laan fbayà di kaflayaman. Laan kenen knagol, bay galan kenen fanlinge ku tamlo du ftabeng di kenen.”

²⁵Dwata, du too mdatah i mgimoam, toogu ge dnayen kadang di bong kastifun i kdee tom. Di kanfe i dademegu to i nun klikò di ge blégu di ge i dsù tafakanggu.

²⁶Na di duh én, i dad to landè, gamkaan ale gusen i nawala; na i dad to fdadong di Amuito Dwata, dnayenla kenen. Kayègu ku banlé gamu Dwata fye knè na klehew i kdeeyu dad to landè na dad to maflayam,