Salmo 22:5-29

⁵Inlisim daida sin am-in ay kaeegyat idi nankararag da et adi da nadisdismaya idi sik-ay nantalkan da.

⁶Ngem mo sak-en, baken ipogaw di omibilangan di iib-a mo adi et kaman bigis ay magay silbi na ay sigaan ya laslasoyen da.

⁷Am-in ay omil-ila et somis-iyek da. Manwegweg da dowan dan omitidtidla.

⁸Kanan da, “Mo siya ay si Diyos di nantalkam, apay ngarud ay adi dakan badangan? Mo tet-ewan kanam ay laylayden daka, into ngin di mangisalakan en sik-a?”

⁹Ngem sik-a met ay Diyos di inmay-ayowan sin naianakak, siya abe sin kamoyang ko ay nansossosoak.

¹⁰Naitalekak en sik-a manlogi sin naianakak, sik-a din Diyos ko manipod sin naisikogak.

¹¹Adi ka koma tomaytaynan tan din problimak et adi makakkaan. Mo adi ka bomadang, magay odom si enak pankamangan.

¹²Din linmilikob ay kaibaw ko, palalo ay ad-ado da. Kaman dan mabonget ay baka ed Basan ay nankapipigsa.

¹³Kaman manngangaed ay layon ay manatakaw si tepek da, nasasagana da ay komat ta pomse da.

¹⁴Isonga din bikas ko et enggay maga ay kaman danom ay naiwasit sin lota. Enggay namaga di pigsak, tan kaman naikomsiw din am-in ay tong-ak. Kaman natonaw ay allid din namnamak ya toled ko, tan enggay naabakak sin peteg ay egyat ko.

¹⁵Enggay namgaan di bagang ko, din dilak et naipket sin tepek ko. Binaybay-am sak-en sin lota ta masokpot di leng-ag ko.

¹⁶San bonggoy di makedse ay ipogaw et linmikob da, atap ay aso ay omas-asag-en di kaiarigan da. Din sikik ya takkay ko et tinodok da.

¹⁷Am-in abe ay tong-ak et mabalin ay bilangen da, din kalaban ko et ominenengneng da.

¹⁸Din badok et nanbibingayan da, din naloyong pay et nanbinonotan da.

¹⁹Sik-a ay Diyos, baken koma sin addawi di panteam, dalasem pay et koma ay en bomadang.

²⁰Es-esa et anggoy di biyag ko, omisalakan ka kod sin kampilan di kaibaw ko, tan maangat da ay kaman natiwel ay aso.

²¹Salaknibam sak-en tan kaman dan layon ay en omisida ono atap ay baka ay kaeegyat di sakngod na.

²²Idad-at kon to din maipanggep en sik-a sin gimong di aag-i, idaydayaw kos sik-a sin kasinsinopan mi:

²³“Dakayo am-in ay mamatpateg en Diyos, idaydayaw yos sisya, dakayo ay polin Jacob, bigbigen yo din kinangato na. Dakayo am-in ay Israelita, patgen ya dayawen yos sisya.

²⁴Tan adi binaybay-an Diyos din kakaasi ya maligligatan, idi inmey da en sisya, adi nan dinokdokogan, et din ad-adawag da, ena aben sinongbatan.”

²⁵Begew sin inam-amag mo et idaydayaw kos sik-a sin sangoanan di am-in ay mamigbig en sik-a, et idawat ko abe din daton ay en ko insapata.

²⁶Mangan din nabibiteg enggana ay mabsog da, din mangan-anap en Diyos et idayaw das sisya, sapay koma ta matagotago da si eng-enggana.

²⁷Am-in ay nasyon isnan daga et bigbigen da ay si Diyos di kosto ay daydayawen da, isonga am-in ay tribu et mansagong da ay en mandayaw en sisya.

²⁸Tan si Diyos di ari ay mangituray sin intiro ay daga.

²⁹Din babaknang et makikan ya mandokmog da en sisya, siya abe din kaseseg-ang ya din dandani di kateyan da, mandokmog da am-in ay mandayaw en sisya.