Salmo 22:2-16

²Megbevayè ku, wazè ku en himeley su maandew wey mezukilem is kebpengumew-umew ku kenikew, iyan, wazà a kenikew tevaka.

³Iyan waǥas ka, ne edeliǥen ka te menge tig-Israel su iyan ka hadì dan.

⁴Midsarig kenikew is menge kepuun dey ne midlibri nu sikandan.

⁵Mignganey ke zan ne midtevangan nu sikandan. Midsarig sikandan kenikew ne wazà sikandan mepakyas.

⁶Ebpeel-elezan a wey edsudien a te menge etew, ke sikandan te, “Wazè din pulus; kenà sikandin iring te etew, kekenà, iring sikandin te tagkey.”

⁷Is kada sevaha he ebpekaahà kedì ne ed-insultu kedì, ne ebpengelengkeleng is egkaǥi te,

⁸“Midsarig ke man buwa te Nengazen, ne maan is wazè ke zin libriya? Ke tutuu he nekepenunuat ka kandin, ne maan is wazè ke zin tevangi?”

⁹Piru iyan ka mibpeǥawas kedì puun te ǥetek te iney ku, ne puun pa te edsusu e pa, ne inlikey a kenikew te ebpekezezaat kedì.

¹⁰Ne puun te kedlusaza kedì ne insarig e en diyà te kenikew, ne iyan ke zà Megbevayè ku.

¹¹Umbe, kenà a kenikew vey-ani su meǥaan en egkeula-ula is melised ne wazà duma he ebpeketavang kedì.

¹²Edliǥuyan a te menge kuntada ku, iring sikandan te memezesen he tudu he vaka ziyà te tanà he Bashan.

¹³Iring daan sikandan te menge erimaung he ebpemenhiniǥer is eginganga he andam en he edaas kedì.

¹⁴Naawè en is desen ku; iring a te wahig he id-ulà, ne henduen be te nekegkikiwey en is menge tulan ku. Naawè en daan is kevurut ku; iring a te netunew he kendilà.

¹⁵Naawè en is desen ku; iring a te tanà he mibadtik, ne mibmevisekeg en is dilè ku. Nengazen, ebey-anan a kenikew minsan pa te edserupatey ad.

¹⁶Midliǥuyan a te lalung he menge etew; iring sikandan te menge asu he ebpemen-erungut kayi te kedì. Mibpelehusan dan is menge belad ku wey menge paa ku.