Salmo 22:12-30

¹²Edliǥuyan a te menge kuntada ku, iring sikandan te memezesen he tudu he vaka ziyà te tanà he Bashan.

¹³Iring daan sikandan te menge erimaung he ebpemenhiniǥer is eginganga he andam en he edaas kedì.

¹⁴Naawè en is desen ku; iring a te wahig he id-ulà, ne henduen be te nekegkikiwey en is menge tulan ku. Naawè en daan is kevurut ku; iring a te netunew he kendilà.

¹⁵Naawè en is desen ku; iring a te tanà he mibadtik, ne mibmevisekeg en is dilè ku. Nengazen, ebey-anan a kenikew minsan pa te edserupatey ad.

¹⁶Midliǥuyan a te lalung he menge etew; iring sikandan te menge asu he ebpemen-erungut kayi te kedì. Mibpelehusan dan is menge belad ku wey menge paa ku.

¹⁷Nenletew en is menge tulan ku; ne is menge etew, ne edtengtengan e zan dà.

¹⁸Mibahinbahin dan is menge visti ku pinaaǥi te ripa.

¹⁹Piru, sikew, Nengazen, kenà a kenikew pekeziyui. Iyan ka ebpekeveǥey kedì te zesen ne tevangi ad guntaan.

²⁰Libriya a su edhimetayan a te menge kuntada ku; kenè nu ituǥut he mepatey a kayì te henduen be te menge asu.

²¹Libriya a su egkeizen a te iring te menge erimaung. Tevaka nu is ampù ku ne libriya a su egkeizen a te iring te menge tudu he vaka.

²²Idsangyew ku ziyà te menge emurè ku te inged is mibpemeelan nu. Edeliǥen ku sikew ziyà te menge kevurunan dan.

²³Sikiyu is edtahud te Nengazen, deliǥa niw sikandin! Sikiyu is menge etew kayì te Israel he menge kevuwazan ni Jacob, bentuǥa niw wey kehendeki niw is Nengazen!

²⁴Su wazè din pesegdana is menge elentusen te menge egkaayuayu. Wazè din sikandan iniyuǥi, kekenà, ebpemineǥen din is kebuyù dan te tavang.

²⁵Midasig a kenikew su wey a medalig kenikew diyà te kevurunan te menge etew nu. Diyà te etuvangan te menge etew he edtahud kenikew, edtumanen ku is menge pesarig ku he ibpemuhat ku ziyà te kenikew.

²⁶Egkaan is menge egkaayuayu ne egkahantey sikandan. Is menge etew he midangep diyà te kenikew ne edalig kenikew. Berakat he mebmeupiya wey mebmeluǥayad is untung dan.

²⁷Egketenuzan ka te langun he menge etew ziyà te minsan hendei kayi te tivuuk he kelibutan ne edlikù dan diyà te kenikew, Nengazen, ne ed-ezapen ke zan,

²⁸Su iyan ka hadì, ne iyan ka edumala te menge nasyun.

²⁹Kenà duwazuwa he edsimba kenikew is langun he menge sepian he etew kayi te kelibutan. Minsan is langun he menge etew he henduen be te ebpematey en, ne ibpeehè dan is kedtahud dan kenikew su edluhud dan. Wey minsan sikan is nemematey en,

³⁰ebpenilbi kenikew is menge kevuwazan dan. Ebpenuruen mehitenged kenikew te Nengazen is huziyan he menge lapis te menge kevuwazan.