Salmo 21:1-12

¹Apo, manragragsak din ari tan pinapigsam sisya, nangabakem et palaloy ragsak na.

²Pinatgam din kararag na et indawat mo din laydena.

³Inmey kan sisya ya ad-ado ay bindisyon di inkoyog mo, sin toktok na, korona ay balitok di inpeey mo.

⁴Biyag di kindaw nan sik-a, yan indawat moy biyag ay eng-enggana.

⁵Madaydayaw din ari gapo sin badang mon sisya, nanbalinem ay nangato ya mandinamag di ngadana.

⁶Wadan sisya din bindisyon mos eng-enggana, gapo sin kawadam, palalo di ragsak na.

⁷Diyos ay Kangatoan, mantalek din ari en sik-a, gapo sin layad mo, mantoltoloy di panturayana.

⁸Depapen din ari am-in din kalabana ya am-in ay malmaliget en sisya.

⁹Apo ari, sin timpo ay panpailaam, mabidang ay apoy di kaiarigam. Kaman okmonen Diyos daida, tan kanen di apoy daida gapo sin bonget na.

¹⁰Ponasem din poli da isnan daga et maga polos di mabay-an en daida.

¹¹Manplano da si naikontra en sik-a, ngem maga polos di pantongpalan da,

¹²tan panaem ropa da et managtag da.