Salmo 19:4-8

⁴ngem din ipaammo da et kaman kali ay madnge sin intiro ay daga. Din agew et in-amagan Diyos si panteana ed daya.

⁵Kaman naragsak ay kaas-asawa na ono din napigsa ay managtag ay malaydan ay makilongba, say kaiarigan din agew mo bomala sin agsapa.

⁶Bomala sin esa ay soli ed daya enggana ay domateng sin esa abe ay soli na, et maga di makalisi sin atong na.

⁷Din kalin Diyos et kostokosto, magay kaoyawana, baro ay biyag ya pigsan di nemnem di idawdawat na. Din inpaammon Diyos ay pinaneknekana et kosto ay pantalkan tan dadlon tet-ewa. Say mangipalaing sin kolang di adal na.

⁸Din bilbilin Diyos et kosto di ibagbaga na, am-in ay mangonod et maragsakan da. Magay kinalawan di am-in ay linteg na, kaman silaw sin nemnem di ipogaw mo maawatan da.