Salmo 18:7-32

⁷Ne zutun ne midlinug, ne minsan is menge pundasyun te menge vuvungan ne neyunggat, tenged te kegkepauk nu, Nengazen.

⁸Migawas is evel puun te izung nu, ne ziyà te vèbè nu migawas is mekahandekhandek he hapuy wey egkeregreg he menge vaǥa.

⁹Mibpuwasan nu is langit iring te kebpuwas te kurtina, ne mibpenaug ka he ziyà med-untud te mekepal he ǥapun.

¹⁰Mid-untud ka te kirubin, ne utew heini meǥaan he edlayang he eduma te keramag.

¹¹Midhimu nu is merusirem he tambun te peliǥuy nu. Mid-eles ka ziyà te mekepal he ǥapun.

¹²Midpengilat diyà te etuvangan nu, ne puun te kivel mid-uzan te menge ǥiyew wey egkeregreg he menge vaǥa.

¹³Is laǥeng nu Nengazen, te Utew Lavew he Megbevayà, iring te ruǥung diyà te langit.

¹⁴Mibpanè nu te kilat is menge kuntada nu, ne nemekepelaǥuy zan he egkengeteranta.

¹⁵Emun edawey ka wey utew ka egkepauk ne egkengemezahan is daǥat ne egkaahà is tanà diyà te kinezizeleman kayi, wey egkaahà is pundasyun te kelibutan.

¹⁶Puun te langit midawat a kenikew, ne inggaun a kenikew puun te mezalem he wahig.

¹⁷Midluwas a kenikew zutun te mekeǥeǥehem he menge kuntada ku he kenè ku egkesukulan.

¹⁸Midsurung e zan hein egkereǥenan a, piru mid-uǥupan a kenikew, Nengazen.

¹⁹Midlibri a kenikew te ebpekekaid pezem kedì su ingkesuat a kenikew.

²⁰Edtuvazan a kenikew su ǥeina te metazeng a, wey wazè ku neveelan he salà.

²¹Su edsunuzen ku is menge paaǥi nu, ne sikew is Nengazen he Megbevayè ku, wazè ku sikew engkezi.

²²Edtumanen ku is langun he menge suǥù nu, ne wazè ku supaka is menge sulunuzen he ibpesunud nu.

²³Netuenan nu he wazà igkesawey te keugelingen ku, ne edlikayan ku is kebaal te salà.

²⁴Edtuvazan a kenikew su neehè nu he metazeng a, ne wazè ku eveelan he ibpekesalà ku.

²⁵Metinumanen ka ziyà te menge etew he metinumanen daan. Meupiya ka ziyà te menge etew he meupiya zaan.

²⁶Tinutuuwà is kebpekidepitè nu te menge etew he tinutuuwà daan is kebpekidepitè dan kenikew, ne metau ka zaan he bales te menge lalung.

²⁷Uya, edlibriyen nu is kenà menge mepelevawen, piru ibpekevavè nu mulà is menge etew he mepelevawen.

²⁸Nengazen he Megbevayè ku, iyan ka kerayag ku. Emun merusirem, ne iyan ka sulù ku.

²⁹Tenged te kedtavang nu, ebpekehimu a he edsurung te menge sundaru, ne egpekehimu a zaan he ebpemenahik te verengbeng he nekeliǥuy te inged.

³⁰Is kenikew he paaǥi, Megbevayà, ne wazè din sayep. Is lalag nu egkeseriǥan. Iring ka te kelasag te langun he ebuyù kenikew te pengalang.

³¹Iyan ke zà, Nengazen, kes Megbevayà; kes endilungè dey he vatu.

³²Iyan ka ebeǥey kedì te zesen wey ebantey kedì diyà te ibayè ku.