43Midluwas a kenikew te ribildi he menge etew. Midhimu a kenikew he pengulu te menge nasyun. Is menge lumelengyawà ne ebpenilbi kedì.
44Midluhud sikandan kedì tenged te kegkehandek dan, ne midtuman dan is suǥù ku.
45Neewaan sikandan te kevurut, umbe migawas dan puun te mid-elesan dan he ebpengerkeren te kegkahandek.
46Uuyag ka, Nengazen! Edeliǥen ka is endilungè ku he vatu. Ibayew ku sikew tenged te iyan ka Megbevayà he menluluwas ku.
47Ebelesan nu is menge kuntada ku, ne ibpesakup nu kedì is menge nasyun.