Salmo 18:38-50

³⁸Midezeetan ku sikandan ne nengepiley zan diyà te uvey te nehitindeǥan ku, ne kenè en sikandan ebpekeenew.

³⁹Mibeǥayan a kenikew te zesen te kebpekidtebek, ne nengezaag ku is menge kuntada ku.

⁴⁰Mibpepeleǥuyan a kenikew te menge kuntada ku, ne midezeetan ku sikandan.

⁴¹Mibuyù dan te tavang, piru wazà midlibri kandan. Nengumew-umew zan kenikew, piru wazè nu sikandan tevaka.

⁴²Midruntek ku sikandan taman te neiring en sikandan te eliyavuk he idlayap te keramag. Midtekutakan ku sikandan he iring te tunaan diyà te menge zalan.

⁴³Midluwas a kenikew te ribildi he menge etew. Midhimu a kenikew he pengulu te menge nasyun. Is menge lumelengyawà ne ebpenilbi kedì.

⁴⁴Midluhud sikandan kedì tenged te kegkehandek dan, ne midtuman dan is suǥù ku.

⁴⁵Neewaan sikandan te kevurut, umbe migawas dan puun te mid-elesan dan he ebpengerkeren te kegkahandek.

⁴⁶Uuyag ka, Nengazen! Edeliǥen ka is endilungè ku he vatu. Ibayew ku sikew tenged te iyan ka Megbevayà he menluluwas ku.

⁴⁷Ebelesan nu is menge kuntada ku, ne ibpesakup nu kedì is menge nasyun.

⁴⁸Midluwas a kenikew zutun te utew menge mesipala he menge kuntada ku, ne ibpezaag nu kedì sikandan.

⁴⁹Umbe, ibpezalig ku sikew ziyà te menge nasyun. Egkentahan ku sikew te menge kedalig.

⁵⁰Is pinilì nu he hadì ebeǥayan nu te zekelà he menge kezeeǥan. Mahal nu si David wey is menge kevuwazan din te wazà pidtemanan.