Salmo 147:5-19

⁵Utew iyan mekeǥeǥehem is Nengazen, ne is ketau zin ne kenà egketegkad.

⁶Impeketikang din is menge egkengaayuayu. Iyan, is menge lalung mulà ne mid-ey-eyazan din te edezaat sikandan.

⁷Kentahi niw is Nengazen duma te kebpeselamat diyà te kandin. Ipezaǥing niw is alpa para te Megbevayè tew.

⁸Midilungan din is langit te menge ǥapun, ne mibpeuzanan din is dini te kelibutan, wey mibpetuvuan din is menge vuntud te menge sagbet.

⁹Iyan sikandin mibeǥey te egkeenen te menge langgam dini te lumpad. Iring din daan te menge pispis te uwak ke egkinahanglan te egkeenen dan.

¹⁰Is igkelipey zin ne kenà iyan is kezesen te menge kudà etawa is meǥaan he menge sundaru,

¹¹kekenà, iyan is edtahud kandin wey edsarig te ǥaǥew zin.

¹²Sikiyu is menge meǥinged diyà te Zion he inged he Jerusalem, deliǥa niw is Nengazen he iyan Megbevayè niw.

¹³Su midlig-enan din is menge pultahan te inged niw. Ne midtuvazan kew zin.

¹⁴Mibeǥayan kew zin te kelinew ziyan te ed-ubpaan niw. Ne midhantey kew zin te meupiya he egkeenen.

¹⁵Ebmenduan din is kelibutan, ne segugunà heini edtuman.

¹⁶Midtembunan din is tanà te ayis ne iring heini te meputì he malung, ne ingkayar zin is pinu he ayis he henduen be te avu.

¹⁷Impeuzan din te ayis he iring te zezeisey he vatu. Ne wazà minsan hentei he ebpeketigker te keǥenew kayi.

¹⁸Ne mibmenduan din heini ne nengetunew heini. Impepengeramag din ne midtudà is wahig.

¹⁹Impahayag din is menge lalag din, menge sulunuzen he ibpesunud din, wey menge suǥù din diyà te menge tig-Israel he menge kevuwazan ni Jacob.