Salmo 147:2-15

²Mid-umanan tukuza te Nengazen is inged he Jerusalem; wey midtiǥum din umana is menge kevuwazan ni Israel he nevihag.

³In-awè din is seeng te egkengeseeng; mibewian din is menge palì dan.

⁴Kandin he ketau ke pira is kezakel te menge vituen ne migngezanan din is kada sevaha kandan.

⁵Utew iyan mekeǥeǥehem is Nengazen, ne is ketau zin ne kenà egketegkad.

⁶Impeketikang din is menge egkengaayuayu. Iyan, is menge lalung mulà ne mid-ey-eyazan din te edezaat sikandan.

⁷Kentahi niw is Nengazen duma te kebpeselamat diyà te kandin. Ipezaǥing niw is alpa para te Megbevayè tew.

⁸Midilungan din is langit te menge ǥapun, ne mibpeuzanan din is dini te kelibutan, wey mibpetuvuan din is menge vuntud te menge sagbet.

⁹Iyan sikandin mibeǥey te egkeenen te menge langgam dini te lumpad. Iring din daan te menge pispis te uwak ke egkinahanglan te egkeenen dan.

¹⁰Is igkelipey zin ne kenà iyan is kezesen te menge kudà etawa is meǥaan he menge sundaru,

¹¹kekenà, iyan is edtahud kandin wey edsarig te ǥaǥew zin.

¹²Sikiyu is menge meǥinged diyà te Zion he inged he Jerusalem, deliǥa niw is Nengazen he iyan Megbevayè niw.

¹³Su midlig-enan din is menge pultahan te inged niw. Ne midtuvazan kew zin.

¹⁴Mibeǥayan kew zin te kelinew ziyan te ed-ubpaan niw. Ne midhantey kew zin te meupiya he egkeenen.

¹⁵Ebmenduan din is kelibutan, ne segugunà heini edtuman.