Salmo 145:4-11

⁴Din nakaskasdaaw ay inam-amag mo et idaydayaw da sin amin ay mansinoskat ay ipogaw isnan daga.

⁵Idaddad-at da din kinangatom ya dayaw mo, ipapasnek ko ay nemnemnemen din nakaskasdaaw ay inam-amag mo.

⁶Idaddad-at din kaipoipogaw din panakabalin mo, din kinangatom abe di idaddad-at ko.

⁷Kanayon ay ipaammo da din madaydayaw ay kinasiged mo ya ikanta da din kinalinteg mo.

⁸Managseg-ang ka ay Diyos ya naanos ka, din layad mo et magay balbaliw na.

⁹Siged di iyat mo ay Diyos sin amin ay ipogaw mo, managseg-ang ka sin amin ay parsua ay inamag mo.

¹⁰Amin ay pinarsuam et daydayawen daka, amin ay ipogaw mo yan man-iyaman dan sik-a.

¹¹Dad-aten dan to din madaydayaw ay turay mo ya din nakaskasdaaw ay inam-amag mo, siya abe sin panakabalin mo, ta ammoan am-in di gagait da di maipanggep en sik-a.