Salmo 145:3-20

³Mekeǥeǥehem ka he Nengazen, umbe ereg ka he edeliǥen. Kenà egketegkad is kegkemekeǥeǥehem nu.

⁴Is kada lapis te kevuwazan, ne idsangyew zan is nezumahan te ǥehem he menge vaal nu ziyà te edsunud kandan he menge kevuwazan.

⁵Egngunngunuen ku is kegkelavew wey kegkemekeǥeǥehem nu, wey is igkeinuinu he menge vaal.

⁶Is menge etew, idsangyew zan is utew egkein-inuwi he menge vaal nu, ne ibpenudtul ku zaan is kegkemekeǥeǥehem nu.

⁷Ibpenudtul zan daan is kegkevantug te keupiya nu he wazè din repeng, wey egkanta zan mehitenged te ketazeng nu.

⁸Nengazen, hihizuwen ka wey iipengen; beliǥeǥawen wey kenà daan melemu he egkepauk.

⁹Nengazen, edtulengezan nu is langun; duen nu hizu te langun he linimbag nu.

¹⁰Ebpekepeselamat kenikew, Nengazen, is langun he linimbag nu; edeliǥen ka te metinumanen he menge etew nu.

¹¹Ibpenudtul zan is kegkemekeǥeǥehem te ginhedian nu wey is kegkemekeǥeǥehem nu,

¹²su wey mesayud is langun he keet-etawan te nezumahan te ǥehem he menge vineelan nu wey is mekeǥeǥehem he ginhedian nu.

¹³Is kedhadì nu wazà pidtemanan. Nengazen ka he metinumanen te langun he menge penaad nu, wey veliǥeǥawen ka te langun he linimbag nu.

¹⁴Midtevangan nu is langun he edlised wey midlig-enan nu is langun he meǥuyà.

¹⁵Midsarig diyà te kenikew is langun he uuyag he linimbag, ne mibeǥayan nu sikandan te keuyaǥan dan te timpu he egkinehenglanen dan en.

¹⁶Ne kenè kurang is ibeǥey nu umbe egkengahantey sikandan.

¹⁷Nengazen, metazeng ka, ziyà te langun he paaǥi nu, ne hihizuwen ka ziyà te langun he ebeelan nu.

¹⁸Uvey nu zà, Nengazen, is langun he epengumew-umew kenikew te tinutuuwà.

¹⁹Is menge edtahud kenikew ne ebeǥayan nu sikandan te penganduy zan; ebpemineǥen nu is pengumew-umew zan kenikew, ne edluwasen nu sikandan.

²⁰Binentayan nu layun is langun he etew he mibmahal kenikew, iyan, edezeetan nu mulà is langun he menge lalung.