Salmo 144:4-14

⁴Din biyag di ipogaw et owat kaman dagem, mamaga ay kaman alidong.

⁵Apo, pansianem ed daya ta bomaba ka, giwitem din dontog et omasok da.

⁶Pankimatem ta mansisian din kalaban ko, beksem din panam ta managtag da, Apo.

⁷Iadawam san takkay mo issan kad-am ed daya, ta sin malosong ay danom, komay-at ka. Sin panangituray di mangili, omisalakan ka,

⁸makaetek da olay sin sapata da.

⁹Apo, enak mankanta ay makompasan si arpa, baro ay kanta paran sik-a.

¹⁰Din aari yan pangabakem daida, isalakan mo nan si David ay mansilsilbin sik-a.

¹¹Sin makedse ay kalaban ko, omisalakan ka koma, mangili da ay makaetek olay sin sapata da.

¹²Din babbaro ay an-ak mi yan domakdake da koma ya pomigsa da ay kaman mola. Din kaiarigan aben din babalasang ay an-ak mi, Apo, yan din posti ay naaltialtian sin solin di palasyo.

¹³Sapay koma ta mapno din agamang mi si amin ay kalasin di apit mi. Din kakarnero sin pastolan mi et sapay koma ta niliblibo di an-ak da.

¹⁴Din baka mi abe et sapay koma ta tomaba ya pomigsa da. Maga koma di mangobat sin ili ya magay maibalod sin addawi. Maga koma abe di man-adawag sin kalsada gapo si ligat da.