Salmo 136:1-24

¹Peselemati is Nengazen su meupiya sikandin. Wazà pidtemanan te ǥaǥew zin.

²Peselemati is Megbevayà he lavew te langun he zuma he menge ed-ezapen. Wazà pidtemanan te ǥaǥew zin.

³Peselemati is Nengazen he utew lavew te langun he menge egalen. Wazà pidtemanan te ǥaǥew zin.

⁴Iyan dà sikandin midhimu te egkein-inuwan he menge hitavù. Wazà pidtemanan te ǥaǥew zin.

⁵Pinaaǥi te ketau zin, mibeelan din is langit. Wazà pidtemanan te ǥaǥew zin.

⁶Impelastar zin is tanà diyà te ebpekelapew te wahig. Wazà pidtemanan te ǥaǥew zin.

⁷Mibeelan din is andew wey vulan. Wazà pidtemanan te ǥaǥew zin.

⁸Mibeelan din is andew para meketayew heini emun maandew. Wazà pidtemanan te ǥaǥew zin.

⁹Mibeelan din is bulan wey menge vituen su para meketayew heini emun mezukilem. Wazà pidtemanan te ǥaǥew zin.

¹⁰Mibpenhimetayan din is kinekekayan he menge anak he maama te menge tig-Ehipto. Wazà pidtemanan te ǥaǥew zin.

¹¹Impeǥawas din is menge Israilihanen puun te Ehipto. Wazà pidtemanan te ǥaǥew zin.

¹²Impeǥawas din sikandan pinaaǥi te zekelà he ǥehem din. Wazà pidtemanan te ǥaǥew zin.

¹³Midtevì din is Daǥat he Meriǥà. Wazà pidtemanan te ǥaǥew zin.

¹⁴Ne zutun mebayà te mid-elangan is impelayun din he menge etew zin. Wazà pidtemanan te ǥaǥew zin.

¹⁵Piru midlened din mulà is hadì diyà te Ehipto wey is menge sundaru zin diyà te Zaǥat he Meriǥà. Wazà pidtemanan te ǥaǥew zin.

¹⁶Migiyahan din diyà te sibsivayan is menge etew zin. Wazà pidtemanan te ǥaǥew zin.

¹⁷Mibpendezeetan din is mekeǥeǥehem he menge hadì. Wazà pidtemanan te ǥaǥew zin.

¹⁸Mibpenhimetayan din is bentuǥan he menge hadì. Wazà pidtemanan te ǥaǥew zin.

¹⁹Midhimetayan din si Sihon, is hadì te menge Amorihanen. Wazà pidtemanan te ǥaǥew zin.

²⁰Midhimetayan din daan si Og, is hadì te Bashan. Wazà pidtemanan te ǥaǥew zin.

²¹Imbeǥey zin is tanè dan diyà te menge etew zin su para maangken dan heini. Wazà pidtemanan te ǥaǥew zin.

²²Heini he tanà naangken te menge Israilihanen he menge suluǥuen din. Wazà pidtemanan te ǥaǥew zin.

²³Netenuzan kiw zin hein kenà meupiya is kebpekesavuk tew. Wazà pidtemanan te ǥaǥew zin.

²⁴Midlibri kiw zin te kedezaat te menge kuntada tew. Wazà pidtemanan te ǥaǥew zin.