Salmo 132:9-18

⁹Berakat he layun edtinazeng is menge memumuhat nu, ne egkanta te kegkelipey is metinumanen he menge etew nu.

¹⁰Tenged te suluǥuen nu he si David, kenè nu engkezi is pinilì nu he hadì.

¹¹Nenangdù ka zengan diyà te ki David, ne kenà duwazuwa he edtumanen nu haazà ne kenè nu ebelvelewanan. Ke sikew te, “Sevaha te menge kevuwazan nu is id-ilis ku kenikew he hadì.

¹²Is menge kevuwazan nu he menge hadì, emun edtumanen dan is kebpekid-uyun ku keniyu wey is menge penurù he impenurù ku kandan, edhadì daan sikandan te taman te taman.”

¹³Tutuu he mibpilì wey midtinguhà te Nengazen is Zion, he iyan edhimuwen din he ubpeey zin. Ke sikandin te,

¹⁴“Iyan heini ubpeey ku taman te taman; kayi a ed-ubpà su kayi a egkesuat.

¹⁵Ibeǥey ku ziyà te Zion is langun he kinahanglan din, ne edhentayen ku is menge pubri he menge meǥinged kayi.

¹⁶Layun ku edlibriya is menge memumuhat kayi, ne is metinumanen he menge meǥinged kayi he menge etew ku, layun ebpemenganta te kegkelipey zan.

¹⁷Ibpahadì ku ziyà te Zion is hadì he kevuwazan ni David ne egkeiring sikandin te sulù he kenà egkeevukan.

¹⁸Ebpeel-elezan ku is menge kuntada zin, piru ibpeuswag ku mulà is ginhedian din.”