Salmo 119:65-86

⁶⁵Din karim en sak-en et tinongtongpal mo, tan bininbindisyonam sak-en ay bag-en mo.

⁶⁶Kedawek en sik-a di sirib ya laing ko ay mannemnem ya mangamag si kosto, tan mantalekak sin bilbilin mo.

⁶⁷Ed idi, kanayon ay masangsangawak, et dinosam sak-en ta say manpakombabaak, ngem ed wani, din kalim di on-onodak.

⁶⁸Siged ka et siged amin ay am-amagem, itdom kod linteg mo en sak-en.

⁶⁹Domadael ya omipalawlawa din mangit-it-ek si awak da, ngem ipakat ko amin ay kabaelak ta din bilbilin mo di onodak.

⁷⁰Din kalim, adi da maawatan, ngem sak-en pay et say enak panragsakan.

⁷¹Pansigdak din dosa ay indawat mo, tan begew isdi, maawatak din linteg mo.

⁷²Nabanbanol en sak-en din en ka initdo, mo din balitok ya palata ay kalibolibo.

⁷³Pinarsuam ya inayowanam sak-en si kosto, isonga idawat mo kod di laing ko ay mangawat sin bilbilin mo.

⁷⁴Omila din mangipatpateg en sik-a. Gapo ta mantalekak sin karim, malaydan da.

⁷⁵Ammok ay nalinteg din inkeddeng mo, isonga din panosdosaam en sak-en et kosto.

⁷⁶Liwliwaem komas sak-en sin adi manbalbaliw ay layad mo ay kaman din inkarim en sak-en ay bag-en mo.

⁷⁷Maseg-ang ka kod ta ganasek nan biyag ko, tan say panragsakak din kalim ay inpaisolat mo.

⁷⁸Maibabain da koma din mangipangpangato si awak da gapo sin ipabasbasol dan sak-en ay baken tet-ewa, tan mo sak-en pay et ipapasnek ko ay nemnemnemen din bilbilin mo.

⁷⁹Naey abe di pamagbaga sin am-in ay mangipateg en sik-a: omali da koma en sak-en ay manpaitdo ta say adalen da din intolag mo.

⁸⁰Sapay koma ta ipakat kon kabaelak ay manongpal sin linteg mo ay magay pankolangak ta mailisiak si kaibabainak.

⁸¹Nabayag ay sinsin-ed ko din omisalakanam, ngem din karim di pantalkak pay dedan.

⁸²Din panongpalam sin karim, nabayag ay sinsin-ed ko. “Pig-an ngin ay omisalakan ka?” siya say salodsod ko.

⁸³Maiarigak si magay silbi na ay lalat ay nakpit ya napagitan, ngem din linteg mo et adiak nilinglingan.

⁸⁴Sak-en ay baam, intoy kabayag di panseedak? Pig-an pay ay dosaem din pomalpaligat?

⁸⁵Din nalastog ay ipogaw ay manigaan sin linteg mo et kaman dan nankaot si bito ta mo maknaak ya madadael din dayaw ko.

⁸⁶Da nan makaetek ay ipogaw, istay dan gagaraen nan biyag ko, ngem inpapatik pay dedan ay nanongtongpal sin bilbilin mo. Bomadang ka kod, sik-a ay Diyos ko, tan ibilang ko ay kostokosto san bilbilin mo.