Salmo 119:52-78

⁵²Mo nemnemek din inkeddeng mo ed nabaon, Apo, say tomalnaan ya pomigsaan di nemnem ko.

⁵³Ngem palalo di bonget ko gapo sin makedse ay manokog sin inpaisolat mo.

⁵⁴Din linteg mo di enak ikankanta isnan aptik ay biyag kos nan daga.

⁵⁵Olay sin labi yan nemnemnemek sik-a, Apo, ya din kalim ay inpaisolat mo.

⁵⁶Siya na di kanayon ay inam-amag ko, tinongtongpal ko din bilbilin mo.

⁵⁷Sik-a ay Diyos anggoy di masapol ko, ikarik ay patiek din kalim ay inpaisolat mo.

⁵⁸Napasnekak ay manpakaasi en sik-a, Apo, ta kedawek din inkarim ay seg-ang mo.

⁵⁹Idi inadaadal ko din biyag ko, nanbabawiak et ikarik ay mangonod sin intolag mo.

⁶⁰Tongpalek ay dagos din bilbilin mo.

⁶¹Nan-isagana din managbasol si enak kadadaelan, ngem din kalim et adiak liw-an.

⁶²Bomangonak sin gawan di labi ay mandayaw en sik-a, Apo, tan di iyat mo ay mangokom et kostokosto.

⁶³Makikadwaak sin amin ay mangipateg en sik-a ay din bilbilin mo di on-onodan da.

⁶⁴Mailas nan daga sin amin ay disso din adi manbalbaliw ay layad mo, Apo. Itdom kod en sak-en din linteg mo.

⁶⁵Din karim en sak-en et tinongtongpal mo, tan bininbindisyonam sak-en ay bag-en mo.

⁶⁶Kedawek en sik-a di sirib ya laing ko ay mannemnem ya mangamag si kosto, tan mantalekak sin bilbilin mo.

⁶⁷Ed idi, kanayon ay masangsangawak, et dinosam sak-en ta say manpakombabaak, ngem ed wani, din kalim di on-onodak.

⁶⁸Siged ka et siged amin ay am-amagem, itdom kod linteg mo en sak-en.

⁶⁹Domadael ya omipalawlawa din mangit-it-ek si awak da, ngem ipakat ko amin ay kabaelak ta din bilbilin mo di onodak.

⁷⁰Din kalim, adi da maawatan, ngem sak-en pay et say enak panragsakan.

⁷¹Pansigdak din dosa ay indawat mo, tan begew isdi, maawatak din linteg mo.

⁷²Nabanbanol en sak-en din en ka initdo, mo din balitok ya palata ay kalibolibo.

⁷³Pinarsuam ya inayowanam sak-en si kosto, isonga idawat mo kod di laing ko ay mangawat sin bilbilin mo.

⁷⁴Omila din mangipatpateg en sik-a. Gapo ta mantalekak sin karim, malaydan da.

⁷⁵Ammok ay nalinteg din inkeddeng mo, isonga din panosdosaam en sak-en et kosto.

⁷⁶Liwliwaem komas sak-en sin adi manbalbaliw ay layad mo ay kaman din inkarim en sak-en ay bag-en mo.

⁷⁷Maseg-ang ka kod ta ganasek nan biyag ko, tan say panragsakak din kalim ay inpaisolat mo.

⁷⁸Maibabain da koma din mangipangpangato si awak da gapo sin ipabasbasol dan sak-en ay baken tet-ewa, tan mo sak-en pay et ipapasnek ko ay nemnemnemen din bilbilin mo.