Salmo 119:158-174

¹⁵⁸Egkeepesan ku is menge etew he kenà tinutuuwà is kebpekidepità dan kenikew, su wazè dan tumana is lalag nu.

¹⁵⁹Ahaa nu, Nengazen, ke mibmenumenu ku te ebmahal is menge sulunuzen he ibpesunud nu. Pekeluǥeyaza nu pa is untung ku tenged te kebmahal nu.

¹⁶⁰Tutuu is langun he menge lalag nu, ne wazà pidtemanan te langun he metazeng he menge suǥù nu.

¹⁶¹Mibpesipelahan a te ebpemendumala minsan wazà hustu he hinungdan, piru ebpuun te ǥehinawa ku is kedtehuza ku te lalag nu.

¹⁶²Igkelipey ku is saad nu iring te kelipey te etew he nekaahà te zekelà he ketiǥeyunan.

¹⁶³Igkererengiti ku wey egkeepesan ku is langun he tarù, piru mibmahal ku mulà is kesuǥuan nu.

¹⁶⁴Kepipira a edalig kenikew te senga andew, su ǥeina te metazeng is menge suǥù nu.

¹⁶⁵Ebmeupiya utew is kebpekesavuk te menge etew he ebmahal te kesuǥuan nu. Ne wazà ebpekezezaat kandan.

¹⁶⁶Ebperateng a he edlibriyen a kenikew, Nengazen, ne edtumanen ku is menge suǥù nu.

¹⁶⁷Utew ku mibmahal is menge penurù nu, umbe midpurungan ku heini tumana.

¹⁶⁸Netuenan nu is langun he mibeelan ku, umbe midtuman ku is menge sulunuzen he ibpesunud nu wey menge penurù nu.

¹⁶⁹Nengazen, berakat he ebpemineǥen nu is ked-umawa ku kenikew. Beǥayi a te kedsavut sumalà te insaad nu.

¹⁷⁰Berakat he ebpemineǥen nu is ked-ampù ku. Libriya a sumalà is saad nu.

¹⁷¹Layun ku sikew edeliǥa, su mibpenurù a kenikew te menge sulunuzen he ibpesunud nu.

¹⁷²Egkanta a mehitenged te lalag nu, su metazeng is langun he menge suǥù nu.

¹⁷³Berakat he layun ka andam he edtavang kedì, su mibpilì ku is kedtuman te menge sulunuzen he ibpesunud nu.

¹⁷⁴Nenganduy a he libriya a kenikew, Nengazen. Nekeveǥey kedì te kelipey is kesuǥuan nu.