Sale 27:1-12

¹Niga Salena Deivida i gilumi. “Bada tana egu yanayana bi yawasana pakana, taunana aubaina aiyai bena yà naile? Tana pilipilimo ya moimoito galamegu, taunana aubaina mote yàma naila.

²Sauginemo kagu ḡaviya, gebogebo lavedi sa suluvaigu, bi sa ḡoeḡoe te maso sai pekigu, ba tedi taudiḡa sai kalabetibeti munaḡedi bi sa kuluva.

³Bamoda ḡaviya wapewapedi sa dubutawagu, tagu mote yama naila. Avena te ḡaviya sa suluvaigu, bi tagu yaḡolo te Bada yài sumaḡe.

⁴Tagu mwali ḡemota Bada yai baḡaye te aubaigu ya voiye: Tagu e ḡoe kauwe te egu yawasana tabutabunemo em vanuwemo yà miya, bi yà sibem te tam kuna visu gulata, bi em vanuwa wai waiyawinanemo yà laupali lisimmo.

⁵Sauginemo pilipili e banavidina ba gabu visuvisunemo kwa sako waidavogu, te em vanuwemo kwa labe kauwegu, bi kwa sako saḡegu ḡakima lofalofana dabanemo te egu ḡaviya mote sima suluvaigu.

⁶Egu ḡaviya kaka sa moito kwaiviviligu, bi geḡa te kwa sagugu te egu ḡaviya yà lauyovoḡedi. Bi Maimaituwa em vanuwa noponemo tagu sewasewa yà gabu, tam Bada lisimmo, tagu mayasisigu boiḡatu yà bibi bi ya sale Bada lisimmo.

⁷Bada, laḡannemo yà laupalina ba egu pali kwa vaiye, kwa launuwatoiyegu bi egu pali kwaimune.

⁸Tam kuna giuweguna gado, ‘Kwa nato lisigumo bi kwai baḡa.’ Taunana aubaina niganana lisimmo yà natonato.

⁹Tagu em taupaula, mote kuma medi bi kuma miya tautauliyegu, mote kuma kandavonegu! Tam kunai yawasanigu, bi laḡan matabuna kwa sagusagugu. Taunana aubaina mote kuma gose kamaḡegu!

¹⁰Bamoda tamagu bi tinagu sa dabokegu, bi tam Bada kwa giuvaigu.

¹¹Bada, egu ḡaviya a wapa, taunana aubaina kwai lovelovegu te yà kaiwatam, eta didimaninaḡa kwai doligu.

¹²Mba ḡaviidi kaiyovu giudimo sa waiwavugu, tedi sa ḡoeḡoena sa kagebogebogu, taunana aubaina kuma kita kamaḡedi sima vunugu!