SALAMO 96:1-12

¹Lohiabada dekenai ane matamatana do umui abia. Tanobada dekenai noho taudia ibounai e, Lohiabada dekenai ane do umui abia.

²Lohiabada dekenai ane do umui abia. Iena ladana do umui abia isi! Ia ese ita ia hamauria vadaeni! Dina ibounai lalonai inai sivarai namona, be taunimanima dekenai do ita gwauraia.

³Lohiabada ena hairaina be bese idauidau ibounai dekenai, do umui gwauraia hedinarai. Iena kara badadia be idia ibounai dekenai do umui hadibaia.

⁴Lohiabada be mai ena ladana badana, inai ladana badana do ita abia isi noho be namo. Ita ese taunimanima edia dirava idauidau do ita gari henia lasi. Lohiabada sibona do ita gari henia bona matauraia.

⁵Badina be tanobada bese idauidau edia dirava, be dirava koikoi gaudia sibona. To Lohiabada ese guba bona guba noho gaudia ia karaia vadaeni.

⁶Lohiabada be mai ena hairaina, bona mai King Badana ena siahu danu. Iena Dubu Helaga lalonai, iena siahu bona hairaina idia hedinarai noho.

⁷Tanobada ena bese taudia ibounai e, Lohiabada do umui hanamoa. Iena hairaina bona iena goada badana do umui hanamoa.

⁸Lohiabada ena ladana badana do umui abia isi, bona boubou gauna do umui mailaia, iena Dubu Helaga dekenai do umui henia.

⁹Umui ese mai dabua namodia danu, Lohiabada do umui tomadiho henia. Iena vairana dekenai do umui tui diho mai gari danu.

¹⁰Bese idauidau dekenai inai bamona do umui hereva, do umui gwau, “Lohiabada be King! Ia ese tanobada ia karaia goada, bona tanobada do ia noho namonamo, do ia marere diba lasi. Gabeai Lohiabada ese taunimanima ibounai do ia kota henia. Iena kota be maoromaoro, taunimanima be idauidau, badadia bona maragidia, to maka tamona dekenai do ia kota henidia.”

¹¹Guba bona tanobada e, do umui moale! Davara e, oi bona oi dekenai idia noho gaudia ibounai ese, do umui toreisi, do umui boiboi.

¹²Uma gabudia ibounai e, umui, bona umui dekenai idia noho aniani gaudia ibounai ese, Lohiabada dainai do umui moale. Iena vairana dekenai, uda dekenai idia noho audia ibounai ese, mai moale danu ane do idia abia.