SALAMO 91:4-13

⁴Lohiabada ese iena hanina dekena amo oi do ia koua, vadaeni iena naria dainai oi be do oi mauri. Iena kara be maoromaoro bona momokani dainai, iena gima kara bona naria kara be momokani.

⁵Hanuaboi neganai idia mai dika gaudia, be do oi gari henia lasi, bona dina neganai karaharaga idia ginidae gau dikadia danu, be do oi gari henidia lasi.

⁶Dibura neganai idia vara gorere dikadia danu, be hegeregere lasi oi do idia hagaria. Dina neganai idia toreisi haraga dika badadia dekenai danu, be do oi gari lasi.

⁷Sedira oi kahirakahira be taunimanima 1000 idia mase, bona oiemu imana idibana kahana dekenai, sedira taunimanima 10,000 idia mase, to unai dika be do oi davaria lasi.

⁸Oi ese Dirava ena kara do oi itaia: Ia ese tau dikadia edia kerere davana do ia henia momokani, be do oi itaia.

⁹Bema egu naria Tauna, Siahu Ibounai Diravana, be oiemu gima Tauna, oiemu kohoro oi halaoa,

¹⁰unai neganai dika ta ese oi dekenai do ia kamokau lasi. Oi do ia hadikaia gauna ta, be oiemu ruma dekenai do ia ginidae lasi.

¹¹Dirava ese iena aneru oi dekenai do ia siaia, idia ese oi do idia naria, oiemu loaloa gabudia ibounai dekenai.

¹²Idia ese edia imana dekena amo oi do idia dogoatao, vadaeni oiemu aena be nadi dekenai bero do idia davaria lasi.

¹³Oi ese laiona bona gaigai, bona laiona dagedagedia, bona gaigai badadia danu, do oi moia diho.