Salamo 90:1-17

¹Guiau e, ema aba miatahitahi ede oabom mo, isidi gamagamagari eai.

²Oea tupidi sora nige se tubu, tano eo tanoubu sora nige u hetubudi meta huiana ne i laoma e wauta, eo i lau e nige nosina oabom Eaubada.

³Oa tatao u hebuidi se hemala tanouio; u ene, “Tatao nanatudiyao gamagarimiu e, au uio!”

⁴Paana borimai tausani oa matam eai i lao’o doha lahi, hinage doha maiona esega silawana.

⁵Tatao u ueahaidi; isi doha enosuai mo, doha lei maratomtom eai i ini harihariu:

⁶maratomtom eai ie ini eo ie tubu, maimailahi eai i wowoea eo ie mate.

⁷Paana em ouyalayala eai ai tauyamui; em nuabaaea i wuitawaimai.

⁸Ema laulau gewagewadi wa oa matam eai u hemasarahadi, ema lausapuri eamuyamuidi oa matam marana eai u hemasarahadio.

⁹Paana em nuabaaea eai ema asubena gamagaridi se laoma se lau, ema mauri borimaidi se lao’o doha eahua mo.

¹⁰Ema mauri borimaidi ai hasiridi tatao haiona se mate saudoudoi, e ibai adidirimai eai taba tatao hasi se mate ai lobaidi, na ma amna baaeamai eo ma ai’iwalamai mo, nige baeaona se ohi na ai loi ai lau hari teha eai.

¹¹Em ouyalayala gigiborina eai abina ie ata, eo em ouyalayala eai i matausiei?

¹²Arinai ema asubena hasirina u heatamai abo nuasonoga ai lobai.

¹³GUIAU e, u uioma! Tabu u boneawa! Em heaheari tataodi u nuatoataedi!

¹⁴Maratomtom huiadi eai nuamai u hebigadi em gadosisi miatahitahina arinai, abo ema asubena gamagaridi eai ai nualolo eo ai kode.

¹⁵Asubena gamagamagari u heamnabaaeamai wa, eo borimai gamagamagari hinage amamna aie ita wa gonogonoana abo hinage u hekodemai.

¹⁶Bena am paisoa i masaraha em heaheari tataodi aridi eai; em gigibori namanamarina nanatumyao aridi eai.

¹⁷GUIAU ema Eaubada bena em nualolo i ota ai potamai eai, ema nimapaisoa hinage bena u helolodi, hedeomi, ema nimapaisoa oa bena u helolodi.