SALAMO 90:1-15

¹Lohiabada e, oi sibona be aiemai noho gabuna, gunaguna ia mai bona harihari.

²Oi be nega ibounai, hanaihanai, Dirava oi noho, idaunegai bona gabeai danu. Ororo do oi karaia lasi neganai, tanobada bona motumotu oi do karaia lasi neganai, oi be unai bamona, bona unai bamona do oi noho ela bona hanaihanai.

³Oi ese taunimanima oi hamasea, bona oi ese kahu dekenai idia oi halaoa lou. Bona oi ese oi hereva, oi gwau, “Umui be kahu ena taudia, do umui mase, bona kahu dekenai umui giroa lou.”

⁴Lagani 1000 oiemu vairana dekenai be dina tamona sibona bamona. Idia ore haraga, varani bamona. Idia ore lao, hanuaboi ena hora tamona bamona.

⁵Oi ese taunimanima oi kokia lao, abata ese ia kokidia lao bamona, vadaeni idia mase. Taunimanima be nega kwadogina sibona idia noho, nihi bamona. Idia be hegeregere ava, daba neganai idia tubu matamata bamona,

⁶bona idia bada lao, herahera idia atoa, to adorahi neganai idia kakoro bona idia mase.

⁷Oiemu badu ese ai ia hadikaia ore. Oiemu dagedage ese ai ia hagaria dikadika.

⁸Oi ese aiemai kara dika oi itaia noho, bona hunia dekenai ai kara dika neganai, oi ese oiemu vairana dekenai oi atodia, bona oi dekenai idia hedinarai namonamo.

⁹Oiemu badu ese aiemai tanobada maurina ia hakwadogia noho. Momokani, aiemai mauri ia doko haraga, hahodi tamona bamona.

¹⁰Aiemai mauri lagani be 70 sibona. Bema ai be goada neganai sedira lagani 80 do ai abia, to inai lagani ibounai lalonai, hekwarahi bona lalohisihisi ai abia noho. Aiemai mauri be idia ore haraga, vadaeni ai boio.

¹¹Oiemu badu ena siahu momokani ena mamina be daika ia diba? Oiemu dagedage bada ena gari be daika ia diba namonamo?

¹²Aiemai mauri ena kwadogi mani ai dekenai do oi hadibaia, bona unai dekena amo aonega do ai davaria.

¹³Oiemu badu be do ia noho ela bona edena negai? Mani emu kara, ai, oiemu hesiai taudia dekenai do oi bogahisihisi.

¹⁴Daba daba ibounai oiemu lalokau badana dekena amo, ai do oi hahonua, vadaeni aiemai mauri dinadia ibounai lalonai, mai moale danu do ai noho.

¹⁵Guna oi ese lalohisihisi ai dekenai oi henia. Vadaeni harihari mani emu kara, inai lalohisihisi ena bada hegeregere, moale do oi henia ai dekenai. Momokani lagani momo aiemai noho be dika, to harihari ai do oi hamoalea, unai lagani dikadia edia daudau hegeregerena.