SALAMO 89:1-49

¹Iehova e, emu hebogahisi na do baina anelaia hanaihanai; lau udugu amo emu heabidadama baina gwauraia hedinarai uru iboudiai ediai.

²Badina be emu hebogahisi vada o haginia hanaihanai, emu heabidadama na auka, guba na heto.

³Oi na vada oto: Na abia hidi tauna ida vada a hegwau hamata heheni; egu hesiai tauna David na ini vada na gwau henia hamata toma,

⁴“Oi garamu baina haginidia hanaihanai, oiemu terono baina haginia uru iboudiai lalodiai.” (Selah)

⁵Iehova e, guba ese oiemu hoa ḡaudia bae imodaidia, bona emu heabidadama helaḡa taudia edia hebou ai danu.

⁶Badina be Iehova idaina be daika guba ai? Guba taudia bogaragidiai daika na Iehova heḡereḡerena?

⁷Ia na helaḡa taudia edia hebou ai e gari heniamu Diravana; ia na bada bona mai garina, e ginia hegegemu taudia iboudiai bogaragidiai.

⁸Iehova Sabaota e, Iehova e, emu heabidadama ese e ḡeḡemu dae; daika na mai siahuna oi heḡereḡeremu?

⁹Davara hurehuredia o biagudiamu; hurehure e daemu, to oi ese o hadokodiamu.

¹⁰Rahaba o taoa kohi, mase ḡauna na heto; oi inaimu na imamu siahuna amo o hakarohodia rohoroho.

¹¹Guba na oiemu, tano danu oiemu; tanobada mai lalona ḡaudia iboudiai na oi ese o karadia.

¹²Mirigini kahana bona diho kahana na oi ese o karadia, Taboro bona Heremon ese oi ladamu e heatolaiamu, mai moaledia ida.

¹³Oi imamu na mai siahuna, imamu palapalana na mai goadana, imamu idibana na atai ai.

¹⁴Emu terono badidia na kara maoromaoro bona hahemaoro ḡoevadia; hebogahisi bona heabidadama na oi vairamu ai e laomu.

¹⁵Heimodai honedia mai dibadia taudia be nanamo; Iehova e, idia na oi vairamu diarina ai e rakamu.

¹⁶Idia ese oi ladamu e heaḡilaiamu dina idoinai, idia ese oiemu kara maoromaoro e imodaiamu.

¹⁷Badina be oi na edia goada hairaina; oiemu hahenamo ese emai doa e haduduia isimu.

¹⁸Badina be emai kesi na Iehova ena; emai hanua pavapavana na Israel ena Helaga Diravana ena.

¹⁹Sene negana ai e abidadama henimumu tauna na oi ese mata-hanai ai o hereva henia, oto: Goada tauna kwarana ai havava ḡauna vada na atoa, hanua taudia bogaragidia amo na abia hidi tauna vada na imodaia.

²⁰Egu hesiai tauna David vada na davaria; egu dehoro helaḡana amo vada na horoa,

²¹lau imagu palapalana ese ia baine bamoa hanaihanai bona lau imagu ese ia baine hagoadaia totona.

²²Inai tauna ese basine haerotania, bona kara dika tauna ese basine hahemaraia.

²³Ia inaina baina taodia kohi ia vairanai; e inai heniamu taudia baina rahudia mase.

²⁴Egu heabidadama bona egu hebogahisi na ia ida, lau ladagu ai ena doa baine heabi isi.

²⁵Ia imana na davara latanai baine atoa kau, ia imana idibana sinavai latadiai danu.

²⁶Ia ese baine tai henigu, baineto “Oi na lau Tamagu, egu Dirava, ihamaurigu Nadi-ginina.”

²⁷Bena lau ese tau roboana ai baina halaoa, bona pavapava herea-daena, tanobada pavapavadia bogaragidiai.

²⁸Egu hebogahisi na ienai baina hamomokania hanaihanai, egu gwauhamata na ienai baine gini tutuka-tutuka.

²⁹Ia garana baina haginidia hanaihanai, iena terono do baine mia, guba baine mia dinadia heḡereḡerena.

³⁰Ia natuna ese egu taravatu bema rakatania, bona egu hahedua heḡereḡeredia basiema raka,

³¹egu taravatu bema tata utu, bona egu haheḡani basiema badinadia,

³²bena edia kerere davadia na hedadaba auna amo, bona edia kara dika davadia na hekwadi varodia amo baina henidia.

³³A lau be egu hebogahisi na iena amo basina abia oho, egu heabidadama basina ha-idaua;

³⁴egu gwauhamata na basina rakatania, eiava udugu bibinadia amo e lasi herevadia na basina ha-idaudia.

³⁵Egu helaḡa ai vada na gwau hamata vaitani; David na basina koia.

³⁶Ia garana bae hesiriu hanaihanai, iena terono baine mia, dina na lau vairagu ai e miamu heḡereḡerena;

³⁷hua heḡereḡerena baine gini hanaihanai, baine gini tutuka-tutuka, guba e hesiriumu heḡereḡerena. (Selah)

³⁸A harihari vada o kahua nege bona vada o dadaraia, o horoa tauna na o badu henia lalodikamu.

³⁹Emu gwauhamata na emu hesiai tauna ena amo vada o haloua; ena havava ḡauna na gahu ai vada o hadikaia.

⁴⁰Ena maḡu iboudiai vada o hamakohidia, ena kohoro vada o ḡiḡidia dobi.

⁴¹Raka-hanai taudia iboudiai ese ena kohu e dadihaimu; ia dekena taudia ese e ḡonaḡonalaiamu.

⁴²Ia inaina imadia idibadia vada o abi isi, ia inaina iboudiai vada o hamoaledia.

⁴³Oibe, iena dare matana vada o haloua; tuari ai so haginia auka.

⁴⁴Ena ḡoeva-dae vada o abia oho, ena terono na tano ai vada o ḡiḡia dobi.

⁴⁵Ena malaḡa dinadia vada o hakwadogidia, vada o hahemaraia vaitani. (Selah)

⁴⁶Iehova e, ba noho hehuni ela bona edena nega ai? Ela hanaihanai ai? emu badu baine ḡaraḡara lahi na heto ela bona edena nega ai?

⁴⁷Ba laloa tao, egu mauri dinadia na dia hoho; dahaka badina ai taunimanima natudia o havaradia!

⁴⁸Tau be daika ena mauri baine hesiriu, mase basine mamia toho? Daika sibona mase siahuna amo ia laumana baine hamauria? (Selah)

⁴⁹Ḡaubada e, emu hebogahisi gunana, emu heabidadama amo David o gwaurai henia hamata hebogahisina, ḡauna be edeseni ai?