Salamo 85:4-12

⁴Ema mauri Eaubadana e, bena u helolouioimai, em nuabaaea arimai eai hinage bena u torehesuara!

⁵Abo u ouyalayalaemai i lau e nige nosina? Em ouyalayala abo u tubei i lau e isi gamagari aridi eai?

⁶Taba nige u hemauriuioimai, bena em tataoyao se kode arim eai?

⁷Em gadosisi miamiahaina bena u hemasaraha arimai eai, oe em mauri hinage bena abo u leama.

⁸Hage ea ata’atai Eaubada GUIAU ena riba arinai, paana abo i ribabigabiga ena tataoyao aridi eai, ena tau miatahitahi tataodi aridi eai, isi wa se nuabui ia arinai.

⁹Mamohoi ena abihemauri isi tau matausiena gamagaridi gegesidi eai, bena namanamari abo i otahai ita eda eanua eai.

¹⁰Gadosisi miatahitahina eo ao mamohoina se haihailobai, laulau dudurai eo loni se haitalagadoi.

¹¹Ao mamohoi tano eai abo i inisae, laulau dudurai galewa eai abo i itadobi.

¹²Mamohoi saha eo saha i lolo GUIAU abo i leama, abotai eda tano aiaina abo i helai.