Text copied!
CopyCompare
Buka Helaga - SALAMO - SALAMO 78

SALAMO 78:11-60

Help us?
Click on verse(s) to share them!
11Dirava ena kara be idia laloaboio, bona iena hoa karadia ia hedinaraia gaudia danu, be idia laloaboio.
12Edia sene taudia be, edia matadia dekenai unai hoa karadia idia itaia, Aigupito tano dekenai bona Soana tano palaka dekenai danu.
13Dirava ese danu davara ia hapararaia, bona idia ese idia raka hanaia. Ia ese ranu ia haginia, magu ruaosi bamona.
14Dina dekenai ia ese ori korema dekena amo ia hakaudia, bona hanuaboi ena nega ibounai, be lahi ena diari dekena amo ia hakaudia.
15Taunimanima idia noho lasi tano dekenai, Dirava ese nadi ia hapararaia, bona inua ranu be idia dekenai ia henia, dobu gabudia dekena amo.
16Dirava ese danu nadi dekena amo ranu ia mailaia. Inai ranu be ia heau lao, sinavai bamona.
17To idia ese edia kara dika Dirava dekenai idia karaia noho. Tano kaukau dekenai, Ataiai Herea Dirava dekenai idia dagedage henia.
18Idia ese Dirava idia tohoa. Idia ese idia ura aniani be Dirava dekena amo idia gwauraia.
19Idia ese Dirava idia hereva dika henia, idia gwau, “Dirava ese tano kaukau dekenai, aniani patana ia abia hegaegae diba, a?”
20Idia gwau, “Momokani, nadi ia botaia neganai, ranu ia bubua diho bada herea, to Dirava ese aniani do ia henia diba, bona iena bese taudia dekenai vamu do ia henia diba, a?”
21Lohiabada ese edia hereva badubadu ia kamonai neganai ia badu. Ia ese iena bese taudia lahi dekena amo ia hadikadia. Iena badu be Israela taudia dekenai ia bada lao,
22badina idia ese ia dekenai idia abidadama henia lasi, bona idia ese Dirava ena hamauria siahuna idia hamomokania lasi.
23To Dirava ese guba ataiai dekenai ia hereva henia, ia ese guba ena iduara ia kehoa.
24Bona ia ese mana aniani, be guba dekena amo ia siaia diho. Ia ese guba ena aniani iena bese taudia dekenai ia henia, do idia ania totona.
25Vadaeni idia ese aneru ena aniani idia ania. Bona Dirava ese aniani bada ia siaia, edia ura hegeregerena momokani.
26Dirava ese danu, dina ia daekau kahana dekena amo lai ia havaraia, bona iena siahu dekena amo, diho kahana dekena amo ma lai ta ia havaraia,
27bona iena bese taudia dekenai roho manudia ia siaia diho, momo herea, kone ena miri bamona.
28Edia kamepa ena huana dekenai idia moru diho, edia noho palai rumadia idia hagegea.
29Unai dainai taunimanima idia aniani, bona edia bogadia idia kunu. Dirava ese idia ura gaudia ia henidia.
30To idia ura dikadika aniani idia do ania noho neganai, aniani be do ududia edia lalonai,
31be Dirava ese idia dekenai ia badu, bona edia goada herea taudia be ia ese ia alaia mase. Israela ena eregabe taudia, tau namo hereadia be Lohiabada ese ia hamasea.
32Inai matakani be Dirava ese ia henidia, to idia be idia kara dika noho. Hoa karadia momo Dirava ese ia karaia, to idia ese ia dekenai idia abidadama henia lasi.
33Unai dainai ia ese edia mauri ia hadokoa, hahodi tamona bamona. Edia mauri lagani, mai gari bada danu ia haorea haraga momokani.
34Dirava ese idia haida ia alaia mase neganai, oredia ese ia dekenai idia giroa lou. Idia ese edia lalona idia giroa, bona ia dekenai idia giroa momokani.
35Idia laloa lou, Dirava be idia edia Nadi Badana. Bona idia laloa lou, Siahu Ibounai Dirava be edia hamauria Tauna.
36To edia hereva ibounai be koikoi sibona. Idia ese Dirava idia hanamoa koikoi.
37Idia be Dirava dekenai idia giroa momokani lasi, bona edia gwauhamata ena anina ia dekenai idia karaia lasi.
38To Dirava ese, iena bese taudia dekenai ia bogahisihisi henia. Idia edia kara dika ia gwauatao, bona ia ese idia ia hadikaia ore lasi. Nega momo ia ese iena badu ia hakerua, bona iena badu ena siahu momokani ia havaraia lasi.
39Ia laloatao, idia be taunimanima sibona. Idia be lai bamona, nega tamona sibona ia toa, bona ia toa lou lasi.
40Nega momo, taunimanima idia noho lasi tano dekenai, iena bese taudia ese Dirava idia kamonai henia lasi, mai dagedage danu. Io, nega momo tano kaukau dekenai, idia ese Dirava ena lalona idia hisihisi henia.
41Dirava ena bogahisihisi idia tohoa lou, tohoa lou, bona idia ese Israela edia Helaga Dirava idia habadua.
42Iena siahu bada herea be idia laloaboio. Dirava ese dagedage taudia dekena amo ia hamauridia dinana, be idia ese idia laloaboio.
43Unai dina dekenai, Dirava ese Aigupito dekenai kara badadia ia karaia, bona hoa karadia danu Soana tano palaka dekenai ia karaia.
44Aigupito edia sinavai be rara dekenai ia halaoa, bona Aigupito taudia, be sinavai edia ranu idia inua diba lasi.
45Dirava ese lao momo herea idia edia huanai ia siaia, bona idia hisihisi henidia. Paroparo danu be ia ese ia siaia, edia tano idia hadikaia.
46Dirava ese danu kwadi momo herea ia siaia, edia uma edia anina idia ania ore.
47Edia vain huahua be medu, aisi nadi bamona, dekena amo ia hadikaia ore, bona edia fig audia be keru dekena amo idia mase ore.
48Edia boromakau be medu, aisi nadi bamona, dekena amo ia aladia ore, bona edia mamoe danu, be kevaru dekena amo ia aladia ore.
49Ia ese iena badu bona iena dagedage, be idia edia latanai ia bubua diho. Ia ese idia ia hisihisi henidia momokani. Iena mase havaraia aneru orea ta idia dekenai ia siaia.
50Iena badu be ia ese ia hakerua lasi. Mase dekena amo ia hamauridia lasi. To ia ese hanaia gorere dikana dekena amo ia aladia mase.
51Aigupito taudia edia vara guna natudia tau ibounai, be Dirava ese ia aladia mase, Hamo bese ena vara guna natudia tau ibounai.
52Unai neganai Dirava ese iena bese taudia ia hakaua mai, mamoe naria tauna ese iena mamoe ia hakaua bamona. Ia ese taunimanima idia noho lasi tano kaukau dekenai, ia hakaudia, idia raka hanaia.
53Dala namona dekenai ia hakaudia, vadaeni idia gari lasi. To idia dekenai idia tuari henia taudia, be Dirava ese davara ena lalonai ia hamasedia.
54Dirava ese iena bese taudia ia hakaua, ela bona iena tano helagana dekenai idia ginidae. Unai ororo be ia sibona ese, tuari ena kwalimu dekena amo ia abia guna vadaeni.
55Iena bese taudia idia raka hanaia neganai, unai tano noho taudia be Dirava ese ia luludia ore, bona edia tano be Israela iduhu ta ta edia huanai ia haria. Edia ruma be Israela taudia dekenai ia henia.
56To Israela taudia ese Siahu Ibounai Dirava idia tohoa, bona idia kamonai henia lasi. Idia ese iena taravatu idia utua.
57Mai hekokoroku danu Dirava ena hereva idia utua, edia tamadia hegeregerena. Idia edia kara be gagevagageva, peva gagevagagevana bamona.
58Idia ese dirava koikoidia dekenai boubou patadia idia haginia, ma unai dainai Dirava ia badu. Bona idia ese idia koroa kaivakuku gaudia dekena amo, Dirava idia habadua.
59Inai bamona idia karaia, be Dirava ese ia itaia neganai, ia badu mai siahu danu. Unai dainai ia ese Israela taudia ia negea momokani.
60Vadaeni Dirava ese iena Palai Dubu, Silo dekenai ia noho gauna ia rakatania. Unai Silo Palai Dubu, be taunimanima edia huanai Dirava ia noho guna gauna.

Read SALAMO 78SALAMO 78
Compare SALAMO 78:11-60SALAMO 78:11-60