Text copied!
CopyCompare
RIBA HARIHARIUNA - Salamo - Salamo 73

Salamo 73:3-24

Help us?
Click on verse(s) to share them!
3Paana ede tau nuasaesae ea aiaromagigiriedi, huiana wa tau laulau gewagewa ena gogo ea i’ita.
4Paana isi nige begana amamna se hearo; se amna lolo mo eo se tubu lolo.
5Isi nige se ai’iwala doha tatao headi; pidipidiri nige se hearo doha tatao headi.
6Arinai nuasaesae i hemala adi gadogado; manamanabara i buburidi doha lulu.
7Se tubu lolo ariri arinai matadi se pou, nuatu eauyaule nuadi se hemonau boriboriridi.
8Se riba alaliuliuwa, eo se ribakarapi; tatao se riba hematausidi ma nuasaesaedi.
9Awadi eai galewa se hewaiunuei, eo se ribahetausaeuioidi tanoubu boeana eai.
10Arinai tatao se sinibui eo se ribatausaedi; edi ponori hinage nige se italobaidi.
11Eo si ene, “Mamohoi, Eaubada i nuatui? Saesae Aririna abina ie ata, e nige’e?”
12Mamohoi, tatao baabaaeadi ede ina; huia gamagari taba nige saha se deha, edi gogo mo se helahelai.
13Nuagu ea hea’a gaibui, eo nimagu ea deuridi gaibui laulau dudurai boeana eai:
14Paana asubena lohaloha eai pidipidiri mo ea hearodi, eo maratomtom gamagari maisa mo ea abidi.
15Taba ea ene, “Doha ina abo ea riba”, am isimurita abo ea woeaponoridi.
16Na ena ea aipate ina ginauri ta ea nuatulobai, i heamnabaaea aririegu,
17i lau e ea awasaei Eaubada ena aba mia tabuna eai; abotai adi sigana ea italobai.
18Mamohoi tupo sagisagigi eai oa u hetorodi; abo u heguridi mate arinai.
19Maesega se hebaaea heohidi, matausi lailai arinai se ueagabaedi!
20Guiau e, isi doha enosuai mo, ena u enotoro, enosuai wa u isuewaei, ana ao doha tautau gaibu mo.
21Huiana eai wa ea nuakarapi, eo nuagu i amamna,
22ea eauyaule eo ea supusupu, agu ao doha suisui manamanabarana oa matam eai.
23Taiede huia gamagari eau gegesim eai; nimatutugu u abididini.
24Em nuatu sibasibana arinai u woeaigu, eo maraitom asubena abo u heawasaegu em namanamari eai.

Read Salamo 73Salamo 73
Compare Salamo 73:3-24Salamo 73:3-24